Jezqazǵan qalasynda Nazarbaev Zııatkerlik mektebi ashylýy múmkin
QARAǴANDY. QazAqparat - Jezqazǵan qalasynda Nazarbaev Zııatkerlik mektebi (NZM) ashylýy múmkin, dep habarlaıdy «QazAqparat» HAA tilshisi.
Jezqazǵanda mektep ashý jospary týraly «Nazarbaev Zııatkerlik mektebi» avtonomdyq uıymymen áriptestik ornatý jónindegi memorandýmǵa qol qoıý saltanatynda Qaraǵandy oblysynyń ákimi Erlan Qoshanov málimdedi. Ákimniń aıtýynsha, mektep ashý jospary ázirge usynys qana.
NZM basqarma tóraǵasy Kúlásh Shámshıdınova Nazarbaev Zııatkerlik mektebiniń negizgi maqsaty - ár mekteptiń áleýetin arttyrý ekendigin aıtty.
«Sondyqtan úsh jyl boıy úzdik muǵalimder qatarynan baǵalaý júıesi boıynsha ádisteme jáne oqytý tehnologııasy trenerlerin daıyndap kelemiz. Bıyl zertteý jumystaryn uıymdastyrý boıynsha trenerler daıyndaýdy bastaımyz. Ótken jyldan beri ár aýdan úshin jańartylǵan bilim mazmunyna sáıkes pánder boıynsha ádiskerlerdi daıyndaýdy qolǵa aldyq»,- dedi Kúlásh Shámshıdınova.
Aımaq basshysy sonymen qatar, Nazarbaev Zııatkerlik mektebi iske qosylǵan bes jyl ishinde, joǵary deńgeıli mamandardyń úlgisi bola bilgenin tilge tıek etti.
«Sizderdiń tájirıbelerińiz ben jumys tásilderińizdi orta jáne kásibı bilim salasynyń barlyǵyna engizý kerek. Biz búgin sol úshin ekijaqty áriptestik memorandýmyna qol qoıyp jatyrmyz»,-dedi Erlan Qoshanov.
