Jezqazǵan qalasynda mektep býhgalteri 17 mln teńgeden astam qarjy jymqyrǵan

JEZQAZǴAN. QazAqparat – Jezqazǵan qalasyndaǵy mektepterdiń birinde býhgalter 17 mln teńgeden astam qarjy urlaǵan. Áıel óziniń kinásin moıyndap, urlanǵan aqshany qaıtaryp berdi, alaıda Ulytaý oblysy boıynsha Ekonomıkalyq tergep-tekserý departamenti isti sotqa joldady, dep habarlaıdy QazAqparat tilshisi.

Jezqazǵan qalasyndaǵy jalpy bilim beretin mektepteriniń biriniń bas býhgalteri óziniń qyzmettik jaǵdaıyn paıdalanyp, 17 mln. teńgeden astam bıýdjet qarajatyn jymqyrǵan. Belgili bolǵandaı, bas esepshide tólem operatsııalaryn júrgizýge arnalǵan elektrondyq tsıfrlyq qol tańba bolǵan. Sony paıdalana otyryp, ol qujattarǵa qol qoıyp, elektrondyq qujattarǵa jalǵan aqparat engizgendigi anyqtaldy.

Osylaısha, ol jalaqy tólep jatyrmyn dep, óziniń jeke banktik shotyna jáne atalǵan mekemede naqty jumys istemeıtin tulǵalardyń, atap aıtqanda óziniń jaqyn týystarynyń kartochkalyq shottaryna 17 mıllıon teńgeden astam aqsha aýdarǵan.

Bul isti Ulytaý oblysy boıynsha Ekonomıkalyq tergep-tekserý departamenti tergedi.

«Sotqa deıingi tergeý barysynda bas býhgalter T. kinásin tolyq moıyndap, memleketke keltirilgen materıaldyq zalaldy ótedi. Qylmystyq árekettiń mánin anyqtaý úshin is sotqa jiberildi.

Sonymen qatar oblystyq bilim basqarmasyna qylmystyq quqyq buzýshylyq pen zańnyń basqa da buzýshylyqtaryn jasaýǵa yqpal etken mán-jaılardy joıý jóninde usynys engizildi», - dep habarlady vedomstvodan.

Qylmystyq isti qaraý nátıjeleri boıynsha bas býhgalter teris sebeptermen jumystan shyǵaryldy, al mektep dırektory tıisti vedomstvolyq baqylaý júrgizbegeni úshin qatań tártiptik jaýapkershilikke tartyldy.