Jezqazǵan qalasynda bútin bir shaǵynaýdan 4 kún aýyzsýsyz qaldy
JEZQAZǴAN. QazAqparat – Qaraǵandy oblysynyń Jezqazǵan qalasynda bútin bir shaǵynaýdan birneshe kúnnen beri aýyzsýsyz otyr, dep habarlaıdy QazAqparat.
Temirjol vokzaly shaǵynaýdanynyń turǵyny Ramılıa Nurıslamovanyń aıtýynsha, aýyzsýdyń berilýi toqtaǵanyna búgin tórtinshi kún. Onyń ústine, halyq jóndeý jumystary ne basqasy jóninde aldyn ala eskertilmegen.
«Mundaǵy úılerdiń deni – jer úıler. Aýyzsýmen birge baqshaǵa beriletin sý da toqtady. Aldyn ala habardar etilmegendikten, halyq sý qoryn jınap úlgermedi. Jáne bul birinshi jaǵdaı emes. Esh eskertilmesten sýdyń berilýi 19 shilde kúni de toqtatylǵan bolatyn», - dedi ol agenttik tilshisine.
Jezqazǵan qalasynyń ákimdiginen osy ýaqytta berilgen jaýapqa sáıkes, tirshilik nári búgin berilýi tıis. Sondaı-aq jergilikti bılik jaǵdaıdyń mán-jaıyn jáne halyqtyń kúni buryn nelikten eskertilmegenin túsindirdi.
«Temirjol vokzaly aýdanyndaǵy Imanjanov, Sholohov, Şors, Maıkotov, Shıntýrınov kóshelerinde aýyzsýdyń jýyq aradaǵy kúnderde bolmaýy Maıkotov kóshesinde dıametri 250 mm magıstraldy sý qubyrynyń gıdravlıkalyq soqqy saldarynan jarylýynan oryn aldy. Qazirgi tańda merdiger - «SERVIS NS» JShS tarapynan qaıta qalpyna keltirý jumystary júrgizilýde. Aıaqtalý ýaqyty – aǵymdaǵy jyldyń 31 shildesi, ıaǵnı – búgin.
Merdigerdiń málimetti ýaqytyly ákimdikke jetkizbeýi saldarynan turǵyndardy aqparattandyrý jaǵynan kemshilik jiberilgenin moıyndaımyz jáne turǵyndardan ýaqytsha keltirilgen jaısyzdyqtar úshin keshirim suraımyz», - dedi ákimdiktiń baspasóz qyzmetinen.
Málim etilgendeı, Jezqazǵan qalasyndaǵy aýyzsý qubyrlarynyń 70 paıyzynyń tozýyna baılanysty, sondaı-aq jelilerdegi sý shyǵynyn tómendetý, turǵyndardy sapaly aýyzsýmen qamtamasyz etý úshin respýblıkalyq bıýdjetten qarajat bólinip, 2012 jyly sý qubyrlaryn qaıta qurylymdaý jobasynyń jobalyq-smetalyq qujattamasy ázirlengen. Eki jyldan keıin memlekettik saraptamanyń oń qorytyndysy alynyp, taǵy úsh jyldan soń memlekettik satyp alý týraly kelisimshart negizinde jumystardy atqarý mindeti «SERVIS NS» JShS merdiger kompanııasyna júktelgen. Atalmysh kompanııa eki jyldan beri qubyrlardy jańartý jumysymen aınalysýda.
«Jalpy, jobanyń iske asyrý merzimi 2017-2020 jyldarǵa josparlanǵan», - dedi qala ákimdiginen.
