Jezqazǵan qalasy bir mezgilde jaryq, jylý jáne sýsyz qaldy
QARAǴANDY. QazAqparat - Qaraǵandy oblysynyń Jezqazǵan qalasynda turǵyndar oryn alǵan apat saldarynan bir mezgilde jaryq, jylý, sýyq jáne ystyq sýsyz qaldy, dep habarlaıdy «QazAqparat» tilshisi.
Kommýnaldyq kúıreý týraly jezqazǵandyqtar telefon arqyly habarlady.
«Oryn alǵan shtattan tys jaǵdaı jylýmen qamtý júıesiniń sapasyna áserin tıgizdi. Qala boıynsha jylý berý ólshemderi tómendedi. Buǵan saǵat 17.05-te elektr energııasynyń óshýi sebep boldy. Budan ári, sýmen qamtamasyz etý buzyldy. Ystyq sý bir saǵatqa jýyq bolmady. Jylý taratý toraptarynda ystyq sýdyń aınalymy toqtaǵan joq. Sýyq sý eki saǵatqa jýyq ýaqytqa toqtady», - dep atap ótti Jezqazǵan qalasy ákiminiń orynbasary Nurjan Orynbaev.
Onyń aıtýynsha, qazirgi ýaqytta jaǵdaı turaqtandy.
Aldyn ala málimetter boıynsha, apat Jylý elektr ortalyǵynyń aýmaǵynda joǵary voltty jeliniń úzilýi saldarynan boldy. «Apat sebepteri anyqtalý ústinde», - dep qosty ákim orynbasary.
