Jezqazǵan qalasynyń bıýdjeti men ınvestıtsııalyq áleýeti artyp keledi
JEZQAZǴAN.KAZINFORM — Ulytaý oblysy qurylǵan sátten bastap Jezqazǵan qalasynda áleýmettik-ekonomıkalyq damý kórsetkishteriniń oń dınamıkasy baıqalyp otyr. Sonyń ishinde qala bıýdjetiniń kólemi men ınvestıtsııa tartý deńgeıi aıtarlyqtaı ósti.
Bıylǵy jyly Jezqazǵan qalasynyń menshikti kiristeri úsh esege artyp, 31,4 mlrd teńgege jetti. Jalpy qala bıýdjeti eki esege ósip, 57,6 mlrd teńgeni qurady. Bul kórsetkish 2022 jyly 26,5 mlrd teńge deńgeıinde bolǵan.
Oblys qurylǵannan beri oblystyq bıýdjetten qala bıýdjetine bólinetin damý transfertteri 2,5 esege artyp, 9 mlrd teńgege deıin jetkizildi. Bul qarjy qalanyń ınfraqurylymyn jańǵyrtýǵa jáne mańyzdy áleýmettik-ekonomıkalyq jobalardy iske asyrýǵa baǵyttalyp otyr.
Investıtsııalar óńir ekonomıkasynyń turaqty jáne sapaly ósýiniń negizgi qozǵaýshy kúshi bolyp tabylady. Aǵymdaǵy jyldyń basynan beri Ulytaý oblysynyń ekonomıkasyna 207,3 mlrd teńge ınvestıtsııa tartyldy. Onyń 68 mlrd teńgesi Jezqazǵan qalasyna tıesili. Osylaısha, qalanyń oblys kólemindegi ınvestıtsııalyq úlesi 32,8 paıyzdy qurap otyr.
Ótken jyly óńir ekonomıkasyn ártaraptandyrý aıasynda jalpy quny 34 mlrd teńge bolatyn 9 ınvestıtsııalyq joba iske qosylsa, olardyń beseýi Jezqazǵan qalasynda júzege asyryldy. Bıyl jalpy quny 138 mlrd teńgeni quraıtyn 17 ınvestıtsııalyq joba bastaý aldy.
Qazirgi tańda Jezqazǵan qalasynda munaı bazasy, jel elektr stantsııasy, respırator shyǵaratyn zaýyt, geologııalyq klaster men qonaq úı kesheniniń qurylysy aıaqtaldy. Sonymen qatar asfaltbeton zaýytyn salý jobasy iske asyrylyp jatyr.
Aldaǵy kezeńge de aýqymdy josparlar bar. 2028 jylǵa deıin jalpy quny 920 mlrd teńgeni quraıtyn 25 ınvestıtsııalyq jobany iske asyrý kózdelip otyr. Bul jobalar 2 myńnan astam jańa jumys ornyn ashýǵa múmkindik beredi jáne qalanyń ekonomıkalyq áleýetin odan ári arttyrýǵa yqpal etedi.