Jezqazǵan ІІB basshylyǵy sheteldikten 10 bótelke konıak talap etken
QARAǴANDY. QazAqparat - Jezqazǵan Іshki ister basqarmasy kóshi-qon qyzmetiniń bólim bastyǵy jáne Jezqazǵan ІІB bastyǵynyń orynbasary sheteldik azamattan para alǵany úshin árqaısysy 7 mıllıon teńgeden aıyppul tóleýge mindetteldi, dep habarlaıdy «QazAqparat» HAA tilshisi.
Sottyń anyqtaýynsha, kóshi-qon qyzmetiniń bólim bastyǵy qurylysta jumys isteýge kelgen Ózbekstannyń on úsh azamatyn, sondaı-aq olardy qabyldap alatyn tarapty júzbe-júz kórmesten, sheteldikterdi «TMD azamattaryn tirkeý jýrnalyna» tirkegen. Onyń ústine, qabyldap alatyn tarap jalǵan bolyp shyqqan. Keıin anyqtalǵandaı, olar qabyldaýshy tarap bolyp tabylmaıdy ári qurylys máselelerine esh qatysy joq.
Tergeý barysynda Jezqazǵan ІІB bastyǵynyń orynbasaryna qatysty taǵy bir epızod áshkere boldy. Ol shetel azamatynan elde bolýǵa ruqsatty rásimdeý úshin 100 000 teńge men Qazaqstanda shyǵarylǵan 10 bótelke konıak talap etken. Sheteldik azamat 100 000 teńgeni Jezqazǵan ІІB ǵımaratynda deldal - kóshi-qon qyzmetiniń bólim bastyǵyna jeke tapsyrǵan. Al 10 bótelke konıakty dúkennen tappaǵan soń, taǵy 100 000 teńgeni deldal - qatardaǵy polıtsııa ınspektoryna bergen. Qatardaǵy qyzmetker basshylyqtyń tapsyrmasymen dúkennen 40 000 teńgege 4 bótelke konıak satyp alyp, bastyqtaryna alyp barǵan. Sol jerde olardy Sybaılas jemqorlyqqa qarsy is-qımyl ulttyq bıýrosy departamentiniń qyzmetkerleri ustady.
Jezqazǵan qalalyq sotynyń sýdıasy Gúlsara Baıgenjınova aıyptalýshylardy QK 366-babynyń («Para alý») 3-bóligi, QK 361-babynyń («Laýazymdyq ókilettikterdi teris paıdalaný») 2-bóligi jáne QK 394-babynyń («Zańsyz kóshi-qondy uıymdastyrý») 2-bóligi boıynsha aıypty dep tanydy.
Olardyń árqaısysyna 7 mıllıon teńgeden aıyppul tóleý jazasy taǵaıyndaldy.
Sondaı-aq sottalýshylar ómir boıy memlekettik qyzmette laýazym ıelený quqyǵynan, polıtsııa polkovnıgi jáne polıtsııa kapıtany shenderinen aıyryldy.
