Jezqazǵan halqyn aýyz sýmen qamtý Úkimettiń erekshe baqylaýynda
«Memleket basshysynyń tapsyrmasyna sáıkes jáne Jezqazǵan qalasyna oblys ortalyǵy mártebesi berilgenin eskersek, sýmen úzdiksiz qamtamasyz etý máselesin sheshý birinshi kezektegi mindet bolyp sanalady. Bıyl Sátbaev qalasyn jáne ishinara Jezqazǵan qalasyn sapaly aýyz sýmen qamtamasyz etýge múmkindik beretin Esqula sý qubyrynyń qurylysyn aıaqtaý josparlanýda. Máseleni tolyq sheshý úshin Qojamseıit ken ornyn eskerip, Úıtas-Aıdos sý tartqyshyn rekonstrýktsııalaý jolymen jerasty sýmen jabdyqtaý kózderine kóshý josparlanýda. Osyǵan baılanysty «Qazaqmys» korporatsııasy» jaýapkershiligi shekteýli seriktestigi sý tartqyshty keshendi rekonstrýktsııalaý boıynsha jobalaý-smetalyq qujattamasyn ázirleýde», - dedi Úkimet basshysy.
Onyń dereginshe, joba 4 kezeń boıynsha júzege asyrylady. Birinshi, Jezqazǵan qalasynyń sharýashylyq aýyz sý tazartý qondyrǵysyna deıin sýtartqysh salynyp, Úıtas-Aıdos toǵanynyń II kótergishiniń sorǵy stantsııasy rekonstrýktsııalanady. Ekinshi, jumys istep turǵan uńǵymalardy rekonstrýktsııalaý, Aıdos ken ornynyń jumys istemeıtin uńǵymalary men qurama kollektorlaryn qaıta burǵylaý júrgiziledi. Úshinshi, jumys istep turǵan uńǵymalardy rekonstrýktsııalaý, Úıtas ken ornynyń jumys istemeıtin uńǵymalary men qurama kollektorlaryn qaıta burǵylaý qolǵa alynda. Tórtinshi, Qojamseıit ken ornynyń sýtartqyshy salynady.
«Osy maqsattar úshin Ulytaý oblysynyń áleýmettik-ekonomıkalyq damýynyń 2022-2026 jyldarǵa arnalǵan keshendi jospary aıasynda respýblıkalyq bıýdjetten jalpy somasy 46,8 mlrd teńgeni (2023 jylǵa – 12,4 mlrd teńge, 2024 jylǵa – 17,4 mlrd teńge, 2025 jylǵa – 11,0 mlrd teńge, 2026 jylǵa – 6,0 mlrd teńge) quraıtyn shyǵystar kózdelgen. Rekonstrýktsııalaýdyń birinshi kezeńi boıynsha memlekettik saraptamanyń oń qorytyndysy alyndy. Ol búgingi kúni respýblıkalyq menshikke berildi. Jalpy Jezqazǵan qalasynyń halqyn aýyz sýmen qamtamasyz etý máselesi Úkimettiń erekshe baqylaýynda turǵanyn atap ótemin», - dedi Álıhan Smaıylov.
