«Jezqazǵan-Eır» AQ-ǵa qatysty antımonopolııalyq tergeý materıaldary QMA-ǵa joldanady
ASTANA. KAZINFORM — Kassatsııalyq sot «Jezqazǵan-Eır» aktsıonerlik qoǵamyna qatysty júrgizilgen tergeý qorytyndysy men habarlamalarynyń zańdylyǵyn rastady. Bul týraly Básekelestikti qorǵaý jáne damytý agenttigi málim etti.
Qazaqstan Respýblıkasynyń Básekelestikti qorǵaý jáne damytý agenttiginiń Ulytaý oblysy boıynsha departamenti 2024 jyly «Jezqazǵan-Eır» aktsıonerlik qoǵamyna qatysty antımonopolııalyq tergeý júrgizgen bolatyn.
Tergeý qorytyndysy boıynsha, kompanııanyń áreketterinde Qazaqstan Respýblıkasynyń básekelestik týraly zańnamasyn buzý belgileri anyqtalǵan.
Kompanııa Departament qorytyndylarymen kelispeı, Ulytaý oblysynyń aýdanaralyq mamandandyrylǵan ákimshilik sotyna júgindi.
2024 jylǵy 25 qarashadaǵy sot sheshimimen kompanııanyń ákimshilik talaby qanaǵattandyrylyp, tergep-tekserý qorytyndysy men zań buzýshylyq belgileri týraly habarlama kúshin joıǵan bolatyn.
Bul sheshimmen kelispegen Departament apellıatsııalyq shaǵym túsirdi.
2025 jylǵy 20 naýryzda Ulytaý oblystyq sotynyń ákimshilik ister jónindegi sot alqasy birinshi satydaǵy sot sheshimin joıyp, jańa sheshim qabyldady — «Jezqazǵan-Eır» AQ talap-aryzy tolyǵymen qanaǵattandyrýsyz qaldyryldy.
Osylaısha, Departamenttiń apellıatsııalyq shaǵymy qanaǵattandyryldy.
«Jezqazǵan-Eır» AQ kassatsııalyq shaǵym túsirgenimen, 2025 jylǵy 23 qazandaǵy kassatsııalyq sot qaýlysymen ol qanaǵattandyrýsyz qaldyryldy.
2025 jylǵy 20 naýryzdaǵy Ulytaý oblystyq sotynyń sheshimi zańdy kúshinde qaldy.
Departament qorytyndysyna sáıkes, «Jezqazǵan-Eır» AQ monopolııalyq qyzmet nátıjesinde 2022 jylǵy qarasha men 2023 jylǵy mamyr aralyǵynda avıaotyndy satýdan 276 768 379 teńge tabys alǵan.
Onyń ishinde monopolııalyq tabys kólemi — 22 919 186 teńge, al aınalymnyń 3%-y — 8 303 051 teńgeni qurady.
— Alynǵan tabys 20 000 aılyq eseptik kórsetkishten asyp ketkendikten jáne Aktsıonerlik qoǵam laýazymdy tulǵalarynyń áreketterinde qylmystyq sıpattaǵy quqyq buzýshylyq belgileri bolýy múmkin bolǵandyqtan, tergeý materıaldary buǵan deıin Qarjy monıtorıngi agenttiginiń Ulytaý oblysy boıynsha ekonomıkalyq tergeý departamentine joldanǵan edi, — delingen habarlamada.
Alaıda sot protsesine baılanysty materıaldardy qaraý ýaqytsha toqtatylǵan bolatyn.
Endi kassatsııalyq sot qaýlysynyń zańdy kúshine enýine baılanysty, barlyq sot sheshimderi, onyń ishinde sońǵy qaýly, Ulytaý oblysy boıynsha ekonomıkalyq tergeý departamentine odan ári qaraý jáne tıisti sharalar qabyldaý úshin joldanady.
Eske sala keteıik, buǵan deıin BQO-da monopolııaǵa qarsy zańnamany buzǵany úshin «Aqjaiyq» ÁKK-ǵa aıyppul salynǵan bolatyn.