Jezqazǵan – Astana baǵytyndaǵy poıyz júk vagonymen soqtyǵysa jazdady

ASTANA. KAZINFORM — Búgin saǵat 21:38-de Jaryq – Jezqazǵan ýchaskesindegi Qyzyljar – Túıemoınaq aralyǵynda Jezqazǵan – Astana baǵytyndaǵy №107 jolaýshylar poıyzynyń mashınısi jyldamdyǵy 12 km/saǵ bolǵan kezde jolda bóget turǵanyn baıqap, poıyzdy shuǵyl toqtatýǵa májbúr boldy. Kedergi — temirjol ústinde turǵan júk vagony bolǵan. Bul týraly «Qazaqstan temir joly» AQ baspasóz qyzmeti málim etti.

— Lokomotıv brıgadasynyń kásibı ári jedel áreketteriniń arqasynda iri zardaptardyń aldyn alýǵa múmkindik týdy. Dese de poıyz ben júk vagony qatty túıisken. Qaza tapqandar joq, alaıda keıbir jolaýshylar shuǵyl toqtaýdyń saldarynan jeńil jaraqat aldy, — delingen habarlamada.

Poıyz saǵat 23:14–te saparyn qaıta jalǵastyrdy. Temirjol ınfraqurylymy men lokomotıvke zaqym kelmegeni habarlandy.

Kompanııanyń málimietinshe, oqıǵanyń sebepteri anyqtalyp jatyr. Jaǵdaıdyń mán-jaıyn anyqtaý úshin oqıǵa ornyna Qazaqstan temir joly» AQ basqarma tóraǵasynyń orynbasary basqaratyn arnaıy komıssııa attandy.

Eske sala keteıik, buǵan deıin Shyǵys Qazaqstanda eki áıeldi poıyz basyp ketkenin jazǵan bolatynbyz.