Jezqazǵan ákimi Qaırat Shaıjanov qyzmetinen ketetinin málimdedi
ASTANA. KAZINFORM – Jezqazǵan qalasynyń ákimi Qaırat Shaıjanov qala basshysy qyzmetin aıaqtaıtynyn málimdep, turǵyndarǵa úndeý joldady.
Qaırat Shaıjanov Jezqazǵan qalasynyń ákimi qyzmetine 2022 jylǵy maýsymda taǵaıyndalǵan.
Ol tórt jylǵa jýyq ýaqyt ishinde qala turǵyndarymen birge Jezqazǵandy damytý baǵytynda jumys istegenin atap ótti.
– Tórt jyl ishinde sizdermen birge qalanyń ystyǵyna kúıip, sýyǵyna tońyp, týǵan qalamyzdyń damýy úshin shamamyz kelgenshe eńbek ettik. Bul kezeń men úshin úlken jaýapkershilikpen qatar, úlken mektep, ómirlik tájirıbe boldy. Osy ýaqyt ishinde talaı máseleni birge kóterdik, talaı bastamany birge júzege asyrdyq. Árbir kezdesýdiń, árbir usynys pen pikirdiń men úshin óz orny bar. Qoldaǵan jerlerińizde qanattanyp, synaǵan jerlerińizde shyńdala tústim, – dedi Qaırat Shaıjanov.
Ol ózine senim bildirip, qoldaý kórsetken qala turǵyndaryna alǵys aıtty. Sondaı-aq Jezqazǵannyń ózi úshin jaı ǵana qyzmet atqarǵan qala emes, taǵdyrymen, eńbegimen jáne estelikterimen baılanysqan týǵan jer ekenin jetkizdi.
– Qyzmet aıaqtalǵanymen, Jezqazǵanǵa degen janashyrlyǵym men aq tilegim eshqashan aıaqtalmaıdy. Qalamyzdyń damýy jalǵasyn taýyp, ár shańyraqta bereke men tynyshtyq ornasyn! Jezqazǵannyń bolashaǵy jarqyn bolsyn! – dedi ol.
Aıta keteıik, Atyraý ákimi Shákir Keıkın de óz erkimen qyzmetinen ketkeni habarlandy.
