Jetisýlyqtar saılaý ýchaskelerine toptasyp kelip daýys berip jatyr
TALDYQORǴAN. KAZINFORM — Jetisý oblysynyń turǵyndary saılaý ýchaskelerine toptasyp kelip, Quryltaı saılaýyna daýys berip jatyr. Osylaısha óńir halqy óziniń azamattyq belsendiligin tanytyp, el bolashaǵyna jaýapkershilikpen qaraıtynyn kórsetýde. Saılaýda alǵashqylardyń biri bolyp oblys ákimi Beıbit Isabaev ta óz tańdaýyn jasady.
Máselen, Alakól aýdanynyń Qaınar aýylynda Q.Sqaquly, І.Jansúgirov, M.Mámetova, B. Momyshuly kósheleriniń 40 turǵyny saılaý ýchaskesine bir mezgilde baryp, daýys berdi. Sol sııaqty «Bir kóshe — bir daýys» bastamasyna Tekeli qalasyndaǵy ál-Farabı kóshesiniń 50-ge jýyq turǵyny da belsene qatysyp, № 452 saılaý ýchaskesine birge keldi. Sondaı-aq Sarqan aýdanynyń Shatyrbaı aýylynda turatyn 50 azamat birligin tanytyp, azamattyq belsendilik baıqatty.
Aqsý aýdanynyń 16 aýyldyq okrýginde bir mezgilde 500 adam tańdaý jasady. Solardyń biri Jansúgirov aýylynyń turǵyny Beıbit Turarbaıuly pikir bildirdi.
— Biz bir aýyldyń turǵyndary retinde birge keldik, árqaısymyz óz tańdaýymyzdy jasadyq. Eń bastysy — tuńǵysh ret ótip jatqan Quryltaı saılaýyna belsendi qatysyp, óz daýysymyzdy berý arqyly eldiń ortaq bolashaǵyna úles qostyq, — dedi ol.
Sol qatarda Eskeldi aýdanynyń turǵyndary da belsendilik tanytýda. Mysaly, Aldabergenov aýylyndaǵy saılaý ýchaskesine 300-ge jýyq turǵyn uıymdasqan túrde kelse, Kókjazyq aýylynyń 100-ge jýyq turǵyny da tańerteńnen belsendilik tanytyp, № 102 saılaý ýchaskesinde daýys berdi.
— Biz azamattyq ustanymymyzdy kórsetý mańyzdy dep sanap, arnaıy birge keldik. Quryltaı jumysynda aýyl turǵyndarynyń múddesi eskerilgenin qalaımyz. Infraqurylymdy damytý, aýyl sharýashylyǵyn qoldaý, jumys oryndaryn ashý, jastarǵa múmkindik jasaý sııaqty máseleler aýyldarymyzdyń turmys-tirshiligine tikeleı áser etedi, — deıdi daýys berýge kelgen Aıtjamal Jumabaeva.
Atap ótsek, oblystaǵy saılaýshylardyń jalpy sany 443 220 adam, onyń 5 503-i alǵash ret daýys beredi. Óńirde 468 saılaý ýchaskesi bar, olar tańǵy saǵat 7.00-den keshki 20.00-ge deıin jumys isteıdi.
