Jetisýlyqtar ózderine tıesili jer telimderin ala almaı júr
TALDYQORǴAN. KAZINFORM — 17 jyl buryn Kerbulaq aýdany, Bostan aýylynyń 100-ge jýyq turǵyny «Alataý Deırı» kompanııasymen jerdi paıdalaný týraly shart jasasqan. Qarashany qaryq qylamyn degen ınvestor óz mindettemelerin oryndaı almaǵan. Bastapqyda turǵyndar astyq, jem, shópten tıesili paılaryn alyp keldi. Odan keıin ol da joq bolǵan. Ashýǵa býlyqqan qarasha halyq endi jerlerin qaıtaryp almaqshy. Olar aryz-shaǵymdaryn aıtyp joǵary sotqa deıin barǵan.
«Halyq keremetke sendi. Alaıda «Alataý Deırı» kompanııasy halyqtyń ábden tózimin taýysyp bitti. Ózderiniń birde-bir ýádelerin oryndaǵan joq», - deıdi sharýalar.
Aýdan ákimdiginiń sózinshe, «Bostan» óndiristik kooperatıviniń quramynda bolǵan 98 úleskerdiń 15-i bólinip shyǵyp, qalǵan 83 sharýa qojalyǵy kelisim-shart boıynsha jer úlesterin zańdy túrde «Alataý Deırı» JShS-niń úlesine ótkizip bergen. Ol sotta da dáleldengenin aıtyp otyr. Búginde aýyl turǵyndary zańdy jer paıdalanýshynyń is-áreketine kedergi jasaǵanyn aıtady.
«Jer úlesteri zańsyz ótkenin aıtyp Bostan aýylynyń turǵyndary aýdandyq, oblystyq, tipti, Qazaqstan Respýblıkasynyń Joǵarǵy sotyna shaǵymdanǵan. Alaıda talap aryzdary qanaǵattandyrylmaǵan, sot sheshimderi boıynsha jer úlesteri «Alataý Deırı» JShS-ne zańdy túrde ótkenderi dáleldendi. Qazirgi tańda aýyl turǵyndary zańdy jer paıdalanýshynyń is-áreketine kedergi jasap, kóktemgi dala jumystaryn júrgizýge tosqaýyl qoıyp otyr. Sonymen qatar Kerbulaq aýdanynyń ákimdigi sharýashylyq sýbektileriniń ishki is-áreketterine jáne jer úlesterin bólý jumystaryna aralasýǵa quzyreti joq. Vıdeotúsirilimde kórsetilgen: «ákim jerdi taratyp jatyr» degen sóz shyndyqqa janaspaıdy. Atalǵan vıdeoda «Alataý Deırı» JShS-niń meńgerýshisimen bolǵan jaǵdaı túsirilgen. Bul jerde ákimdiktiń quzyreti joq», - dedi Kerbulaq aýdany ákimdiginiń baspasóz qyzmeti.
Jalpy, Bostan aýylynda 800-den astam adam turady. Deni egin egedi, mal ósiredi. Ár úıde keminde 10 iri qara men 30-ǵa tarta usaq mal bar. Túıtkildi máseleniń túıini sheshilmeı kele jatqanyna 15 jyldan asqan. Byltyr, aýdan ákimi qos tarapty jınap, jaıylym jáne shabyndyq jerlerdi memleket menshigine qaıtaryp beremiz degen edi. Dese de, turǵyndar talaby áli de oryndalmaı otyr.
