Jetisýlyq júgeri ósirýshiler bıyl da shyǵynǵa ushyraı ma - sharýalar dabyl qaqty

TALDYQORǴAN. KAZINFORM – Jetisýlyq sharýalar bıyl 41 myń gektarǵa júgeri sepken. 2 qyrkúıektegi málimet boıynsha, sonyń 4,7 myń gektary orylǵan. Satyp alýshylar eń joǵarǵy sapadaǵy daqyldyń kelisin 60 teńgeden baǵalap otyr.

Byltyr ónimdi ótkize almaı shyǵynǵa ushyraǵan júgeri ósirýshiler bıyl da eńbek aqtalmaı qala ma dep alańdap otyr. Óıtkeni, júgeriniń tonnasyn 60 myń teńgeden qabyldap jatyr. Onyń ózinde bul ylǵaldylyǵy 14 paıyz daqyldyń baǵasy.

«Júgerini áli jınaǵan joqpyn. Óıtkeni, ylǵaldylyǵyn ólshesem 18 paıyz bolyp tur. Aldaǵy kúnderi jaýyn-shashyn bolmasa 10-12 kúnde keýip qalar. Eger jańbyr bolsa qazirgi sapaǵa da jete almaı qalýymyz múmkin. Táýekelge baryp otyrmyz, óıtkeni osy kúıinde satsań kelisi 43 teńgege ótedi. Odan paıda joq. Satyp alýshylardyń qoıyp otyrǵan baǵasy óte tómen, bul bizdiń shyǵyndy tolyq ótemeıdi»,- deıdi «Kvıtko» sharýa qojalyǵynyń jetekshisi.

Salaǵa jaýaptylar bıyl júgeriniń ár kelisine 10 teńgeden qarjylaı qoldaý beriletinin aıtady. Biraq bul qaıta óńdeýden ótken ónimge ǵana tólenedi. ıAǵnı, zaýytqa ótkizgenderge. Al Panfılov aýdandaǵy kásiporynǵa júgerini jetkizý sharýalar úshin qosymsha shyǵyn. Sondyqtan olar treıderlik kompanııaǵa satýǵa májbúr.

«Ótkizý máselesimen negizinen treıderler shuǵyldanady. Bul sharýalarǵa asa tıimdi emes. Bizde azyq-túlik korporatsııasynyń fılıaly ashylsa, másele retteler edi. Mınıstrdiń tapsyrmasymen bıyl ashý kerek bolǵan, biraq lıtsenzııalyq elevator joq degen syltaýmen ashylmady. Osy máseleniń qolǵa alynýyn barlyq sharýalar tilep otyr. Bıyl da júgeri ósirýshilerdiń jaǵdaıy qıyn. Olarǵa mınıstrlikten kómek kerek»,- deıdi oblystyq fermerler odaǵynyń tóraǵasy Asqar Sháripov.

Al oblystyq aýyl sharýashylyǵy basqarmasynyń basshysy Nurdáýlet Kenenbaev: «osy baǵytta biz eki kásipkermen jumys istep otyrmyz. Barlyq talaptaryna saı kelip tur. Zerthanalyq sertıfıkatqa qujattaryn ótkizdi. Sertıfıkatty alǵannan keıin bizge ótinim beredi. Sodan keıin biz zań talabyna saı bolsa lıtsenzııasyn qolyna beremiz», - deıdi.

Jalpy, bıyl Jetisýda júgeri alqaby 16 myń gektarǵa azaıǵan. 41 myń gektar alqaptan 282 myń tonna júgeri jınalady dep josparlanýda.

Eske sala keteıik, buǵan deıin Jetisý oblysynda aýyl turǵyndary egistik jer ala almaı otyrǵanyn jazǵanbyz.