Jetisýlyq sharýalar qyzylshany zaýytqa ótkizý úshin táýliktep kezekte tur
TALDYQORǴAN. KAZINFORM – Jetisý oblysyndaǵy Kóksý qant zaýytynyń aldynda uzyn-sonar kezek bastaldy. Alys-jaqyn aýdandardan kelgen sharýalar táýlik boıy kezekte turyp, qant qyzylshasyn áreń ótkizip jatyr. Olar jaǵdaı osylaı jalǵasa berse kúzdiń qara sýyǵynda ónimdi úsitip alamyz ba dep alańdaıdy.
Kóksý qant zaýytynyń aldyndaǵy kezek jıyn-terin bastalǵan qyrkúıek aıynan beri ózekti másele bolyp tur. Sharýalar bastapqyda 3-4 saǵatqa sozylǵan kezek, búginde 2-3 táýlikke ulasqanyn aıtyp shaǵymdanýda. Oblystyq fermerler qaýymdastyǵy tóraǵasy qant zaýyttary ónimdi qabyldaýdy sozǵan saıyn sharýalardyń shyǵyny artyp jatqanyn aıtady. Máselen, tátti túbirdi tıep ákelgen júk kólik ıeleri kezek kútken ýaqytyna baılanysty qyzmet qunyn 2 ese ósirip jibergen.
«Qazir sharýalarymyz jınap alǵan ónimin 2-3 táýlik degende áreń ótkizip jatyr. Olar buǵan óte narazy. Ala jazdaı ósirgen ónimdi úsirip alamyz ba degen qaýip bar. Sondyqtan keı dıqandarymyz ónimdi egin alqabyna úıip, úsikten qorǵaý úshin kómip jatyr. Fermerler qaýymdastyǵynyń atynan oblys ákimine hat joldap otyrmyz. Óńir basshysynan Jambyl oblysynyń qant qyzylshasyn qabyldaýdy ýaqytsha toqtata turýyn, zaýyttardyń ónimdi qabyldaý kólemin arttyrýdy suraımyz»,- deıdi Jetisý oblystyq fermerler qaýymdastyǵynyń tóraǵasy Asqar Sháripov.
Al kásipkerler ónim qabyldaýda týyndaǵan qıyndyqtardy zaýyt alańy tolyp ketýimen baılanystyrdy. Oblystyq aýylsharýashylyǵy basqarmasynyń basshysy N. Kenenbaev pen qos zaýyttyń dırektory endi kólik keptelisi bolmaıdy dep sendirdi. Olar bul máseleni aýdandardyń arnaıy kezegin jasaý arqyly sheshetinderin aıtty. Sondaı-aq, «Kóksý» zaýyty búgingi kúnge deıin kúnine 3 myń tonna ónim qabyldasa, endi 4 myńǵa deıin kóbeıtken.
«Kóksý zaýytyna osyǵan deıin kúnine 150-160 mashınaǵa deıin, ıaǵnı 3 myń
tonnaǵa deıin qabyldadyq. Qazir búginge deıin kagat alańynda jatqan 140 myń tonna ónimdi óńdeýge kirgizip jatyrmyz. Degenmen alańdar birden bosaı qoımaıdy, ornyn tazalaý jumystary júredi. Qosymsha jer daıyndap jatyrmyz, buıyrsa 4 myń tonna qabyldaýǵa kóshemiz, - dedi Kóksý qant zaýytynyń dırektory Altynbek Abatov.
«Búgingi kúni Aqsý zaýytyna 210 myń tonna qant qyzylshasy kirdi. Qazannyń 22-sine deıin kúnine 300 mashınadaı qabyldaǵanbyz, qazir kagat alańynyń tolýyna baılanysty kúnine 160-170 mashına kirýde. 25 qazannan beri Jambyl oblysynan qyzylsha qabyldaý toqtatyldy. Qazir Aqsý, Sarqan, Alakól aýdandarynyń sharýashylyqtarynan qyzylsha qabyldanyp jatyr. 1 qarashadan keıin Taldyqorǵan óńirinen ónim qabyldaımyz, - dedi Aqsý qant zaýytynyń dırektory Samat Nádirbaev.
Jalpy, bıyl Jetisý oblysynda 13 700 gektarǵa tátti túbir egilgen. Qazir sharýalar gektarynan 472 tsentnerden ónim alyp otyr. Sala mamandarynyń esebinshe, 615 myń tonna qant qyzylshasy jınalady. Tátti túbirdi túgel qarasha aıynyń 20-syna deıin jınap alý josparlanyp otyr. Eske salaıyq osyǵan deıin Jetisýlyq júgeri ósirýshilerdiń janaıqaıyn jazǵanbyz.
