Jetisýlyq dáriger ushaqta jaǵdaıy kúrt nasharlaǵan jolaýshyny ajal aýzynan alyp qaldy
PAVLODAR. KAZINFORM - Saýd Arabııasyndaǵy qajylyqtan elge oralyp kele jatqan pavlodarlyq azamat jetisýlyq dárigerdiń arqasynda ólimnen aman qaldy. Dáriger onyń ómiri úshin tórt saǵatqa jýyq kúresip, Almatyǵa aman-esen jetkizgen.
Pavlodar qalasynyń turǵyny Murat Imanǵazınov bıylǵy 19 qańtar kúni Saýd Arabııasyndaǵy Jıdda qalasynan Almatyǵa ushaqpen ushyp kele jatyp, aıaq astynan densaýlyǵy kúrt nasharlaıdy. Tumaýǵa qarsy dáriniń birnesheýin iship, uıyqtap ketken otaǵasy arada bir saǵat ótkende bet-aýzym adam tanymastaı isip oıandym deıdi.
- Allergııalyq aýrý paıda bolǵanyn birden sezindim. Betim, moıyn tusym isinip ketken. Jerden 10 myń metr bıiktikte kele jatqan soń ba, tynysym tarylyp, qan qysymym kóterilip, ahýalym nasharlap bara jatqanyn sezindim. Bortserik qyrǵyz qyzy meniń jaǵdaıymdy ushaq ishindegi jolaýshylarǵa habarlap, shuǵyl túrde dáriger qajet ekenin aıtyp jatty. Abyroı bolǵanda bizben birge Jetisý oblysynyń dárigeri Jannur Syrymov degen azamat ushyp kele jatyr eken. Ol birden janyma kelip, dárihana qobdıshasyn alyp shyqty da, maǵan ekpe jasap, sıstema salýdy bastap ketti. Bul ýaqytta biz shamamen Qap taýlarynyń ústinde ushyp kele jatyppyz. Ekıpaj shuǵyl jaǵdaı bolsa, ushaqty jaqyn mańdaǵy áýejaıdyń birine qondyramyz degen sheshim qabyldaǵan eken. Biraq Jannur Máýlenuly óz isiniń kásibı mamany ekenin tanytyp, meniń ómirim úshin tórt saǵattaı kúresip, Almatyǵa aman túsirdi. Ómirime arasha túsken abzal janǵa sheksiz rızashylyǵymdy aıtqym keledi, - deıdi Murat Imanǵazınov.
Jannur Syrymov búginde Jetisý oblysy, Kóksý aýdandyq aýrýhanasynyń bas dárigeri bolyp qyzmet atqaratynyn anyqtadyq. Sol saparynda Mekkege múgedek ákesin qajylyqqa aparyp, qaıtyp kele jatqan beti eken.
«Naýqasqa ómirimde áýede medtsınalyq kómek kórsetem degen oı bolmapty. Ákeme únemi em-dom jasap júretindikten, janymda dári-dármek qobdıshasyn ustaıtynmyn. Bortserik qyzdyń habarlaýynan soń naýqas aǵanyń janyna jedel baryp qarasam, kóziniń aınalasy men beti isine bastaǵan. Muny medıtsına tilinde «Kvınke isinýi» dep ataıdy. Eger 15-20 mınýt ishinde adamǵa medıtsınalyq kómek kórsetilmese, ólip ketýi yqtımal. Birden «Allergopress» jáne «Prednızolon» preparattaryn ektim. Odan soń qan qysymyn ólshep, tiliniń astyna tabletka saldym. Sıstema salýdy da bastap kettim», - dep eske aldy telefon arqyly tildeskenimizde Jannur Syrymov sol bir oqıǵa jaıynda.
Abzal jannyń Gıppokrattyń antyn qabyldap, medıtsına salasyna aralasqanyna 15 jyldyń júzi bolǵan. Ýrolog-transplantolog baǵytyn meńgergen. Kóksý aýdanyndaǵy qyzmetine deıin Almatydaǵy Syzǵanov atyndaǵy ulttyq ǵylymı hırýrgııa ortalyǵynda búırek transplantologııasy, ýrologııa jáne ekstrakorporaldy detoksıkatsııa bólimshesiniń meńgerýshisi, Taldyqorǵan qalasynda aýrýhana basshysynyń orynbasary bolyp eńbek etken. Negizi medıtsına salasyndaǵy alǵashqy qyzmetin sanıtarlyq feldsher bolyp bastapty. «Mundaı shuǵyl sátterde ne isteý kerek ekenin bilemin», deıdi ol. Ári bortserik qyz da kómektesip janynda júrgenin jetkizdi.
Jannur Máýlenulynyń jary da medıtsına salasynda, sáýlelik dıagnostıka dárigeri bolyp jumys isteıdi. Erli-zaıyptylar shańyraǵynda 5 balany ósirip, kópbalaly ári úlgili otbasy atanyp otyr. Syrymovtar otbasy 2023 jyly Jetisý oblystyq «Kóshbasshy» baıqaýynda «Úzdik jas otbasy» nomınatsııasyn ıelengen.
Flynas áýe kompanııasynyń bortserigi Ulkelsin Osýbalıeva mundaı oqys jaǵdaıdy óz qyzmetinde alǵash ret kezdestirip otyrǵanyn áńgimeledi.
- Ózim Qyrǵyz eliniń azamatymyn. Biraz jyldan beri Saýd Arabııasynyń áýe kompanııasynda eńbek etip júrgen jaıym bar. Almatyǵa aıyna kem degende bir márte ushyp kelip, ushyp ketemiz. Jolaýshy Murat Imanǵazınovtyń jaǵdaıy nasharlaǵan alǵashqy sátte kapıtanymyz ushaqty keri buryp, Jıdda qalasynyń áýejaıyna qonýǵa sheshim qabyldaǵan. Biraq keıin bilgenimizdeı, keri oralyp, jerge qonǵansha onyń ómirin aman saqtaý qalýǵa ýaqyt jetpeıdi eken. Dáriger Jannur Syrymovtyń bul reıske otyrǵany da kezdeısoq bolmaǵan dep oılaımyn. Ómirde talaı ǵajaıyptar bolady, biraq adamdy ólim aýzynan alyp qalǵan dárigerdiń erligine tuńǵysh ret kýá boldym,-dedi bortserik qyz aǵynan jarylyp.
Almaty áýejaıy Flynas áýe kompanııasynyń ushaǵyn áýejaıǵa qondyryp, M.Imanǵazınovty jedel járdemmen kútip alǵan. Otaǵasynyń jaǵdaıy búginde qalypty, Pavlodardaǵy otbasyna oraldy.
Eske sala keteıik, Qostanaılyq jedel járdem brıgadasy 24 kúndik sábıdi klınıkalyq ólimnen qutqardy.