Jetisýlyq bloger kásipkerden aqsha bopsalaǵan
TALDYQORǴAN. KAZINFORM — Úshtóbe qalasynda polıtsııa qyzmetkerleri jergilikti blogerdi ustady. Ol kásipkerden 10 mln teńge bopsalady degen kúdikke ilindi.
Jetisý oblystyq polıtsııa departamentiniń dereginshe, bloger úı salýmen aınalysatyn kásipkerden sapasyz qurylys jaıynda túsirilgen vıdeojazbany áleýmettik jelidegi óz paraqshasynan óshirý úshin keıin de oǵan qatysty beınematerıaldardy jarııalamaýǵa, taratpaýǵa ýáde bere otyryp, 10 mln teńge bopsalady dep kúdikke ilingen.
— Jetisý oblysy Polıtsııa departamentiniń Uıymdasqan qylmysqa qarsy kúres basqarmasynyń qyzmetkerleri oblystyq prokýratýranyń úılestirýimen kúdiktini talap etilgen aqshalaı qarajattyń bir bóligi, ıaǵnı 7 mln teńgeni alý kezinde qylmys ústinde ustady. Atalǵan fakt boıynsha QR QK-niń 195-shi baby, 3-tarmaǵymen qylmystyq is qozǵaldy. Tergeý amaldary júrgizilip, kúdiktige qatysty bultartpaý sharasyn tańdaý máselesi qaralýda. Tergeý múddesine baılanysty basqa aqparat jarııalanbaıdy, — dedi Jetisý oblystyq polıtsııa departamentiniń baspasóz qyzmeti.
Eske salaıyq osyǵan deıin memleket qarjysyn jymqyrǵan mektep dırektoryna qatysty sot úkimi shyqqanyn jazǵanbyz.