Jetisýǵa byltyr 2 mln týrıst kelgen
TALDYQORǴAN. KAZINFORM - Jetisýǵa byltyr 2 mln týrıst kelgen. Sondaı-aq, oblysta 3,5 mlrd teńge jeke ınvestıtsııa tartylyp, týrızm salasynda 17 jańa nysan iske qosylǵan.
Jalpy, óńirde týrızm salasyn damytý 5 destınatsııaǵa negizdelgen. Bul – Alakól, Balqash kólderi, «Altynemel» jáne «Jońǵar Alataýy» ulttyq parkteri, sondaı-aq Jońǵar Alataýynyń taý alaby.
«Oblys týrızmin ilgeriletý úshin 2023 jyly «Sıvers alma aǵashynyń gúldeýi festıvali», «Shaǵan Fest», «Kóksý Water Fest», «Altynemel – qulandar mekeni» sııaqty 30-dan astam is-shara ótkizildi. Atalǵan is-sharalar jyl saıyn turaqty túrde uıymdastyrylady. Sondaı-aq týrbıznes, mass-medıa ókilderi úshin óńirdiń týrıstik múmkindikterin nasıhattaý, tanytý jáne týrısterdi tartý úshin 6 aqparattyq týr ótkizildi. Osy jyly da festıvaldar, roýd-shoýlar, túrli aqparattyq týrlar ótkizý, sondaı-aq týrıstik kórmelerge, onyń ishinde halyqaralyq kórmelerge qatysý josparlanǵan», - deıdi basqarma ókilderi.
Sonymen qatar, bıyl Jetisý oblysynda týrızmdi damytý boıynsha master-jospar ázirlenedi.
Master-josparda týrıstik áleýetti taldaý, árbir perspektıvaly oryndar men obektiler boıynsha týrızmniń jańa ósý núktelerin ashý, ınjenerlik, jol ınfraqurylymyn keshendi damytý, damýdyń jańa perspektıvalyq núktelerin qalyptastyrý, derekterdi tsıfrlandyrý, týrıstik navıgatsııany damytý jónindegi jumystar eskeriletin bolady.
