Jetisýdyń shalǵaı aýyldaryna aýyzsý qashan jetedi
TALDYQORǴAN. KAZINFORM- Jetisý oblysynyń shyǵys jaq shetki aýdandarynyń biri – Alakól. Bıyl aýdandaǵy Lepsi, Qońyr sııaqty taý etegindegi aýyldarǵa sý qubyryn tartý jumystary bastalady.
Qazir Alakól aýdanynda aýyzsýdy shanamen tasyp iship otyrǵan aýyldar bar. Sózimizdiń dáleli – Lepsi aýyly. Ondaǵy turǵyndary 50-60 jyldan beri kúndelikti tutynatyn taza sýdy kóshe boıynda toqtaýsyz aǵyp jatqan qudyq- qubyrdan alady.
Bıyl osyndaı birneshe aýylǵa sý jelisin tartý, montajdaý, jańartý jumystary júrgizilmek. Jetisý oblysy ákiminiń baspasóz qyzmetiniń málimetinshe, Alakól aýdanynda 56 eldi mekenniń 48 - ine ortalyqtandyrylǵan aýyz sý júıesi tartylǵan. 2025 jyly Lepsi, Qońyr aýyldarynda sý júıesiniń qurylysy bastalsa, Terekti aýylynda jańǵyrtýdyń 2-shi kezeńi jalǵasady.
- Lepsi aýylyn ortalyqtandyrylǵan sýmen qamtamasyz etý úshin jobalyq-smetalyq qujattama ázirlendi. Jobada 49,4 km sýmen jabdyqtaý jelilerin, 2 sorǵy stantsııasy men 2 rezervýar, sondaı-aq transformatorlyq qosalqy stantsııa, dızeldi elektr stantsııasyn salý kózdelgen. Búgingi tańda merdiger uıym anyqtaldy. Qurylys-montaj jumystaryn aýdannyń aýa raıy jaǵdaıyn eskere otyryp, sáýir aıynda bastaý josparlanyp otyr, - dedi oblystyq Energetıka jáne turǵyn úı kommýnaldyq sharýashylyǵy basqarmasy.
Aıta keteıik Alakól aýdanynda ótken jyly Bıbaqan aýyly ortalyq aýyz sý júıesine qosylsa, Terekti, Kóktuma, Ekpindi aýyldarynda sý jelisine jańǵyrtý júrgizilgen. Toqjaılaý aýylynda qurylys-montaj jumystary aıaqtaldy, qazir sý júıesin tekserý jáne iske qosý jumystary jumystary jalǵasyp jatyr. Jalpy oblysta 2025 jyldyń aıaǵyna qaraı ortalyqtandyrylǵan sýmen qamtamasyz etilgen eldi mekender sany 331-ge jetedi degen jospar bar.
Eske salaıyq osyǵan deıin Jetisý óńirinde aýyl turǵyndary qarjy jınap, kópir salǵanyn jazǵanbyz.