Jetisýda jol-kólik oqıǵasy bir jylda shamamen 3 ese ósken
TALDYQORǴAN. KAZINFORM- Jetisý oblysynda jyl basynan 600-ge jýyq jol-kólik oqıǵasy tirkelip, 120 adam kóz jumdy. Joldyń eń apatty-qaýipti aımaǵy «Almaty-Óskemen» trassasynyń 124-616- shaqyrymyndaǵy aralyq. Bıyl onda 95 oqıǵa tirkelgen.
Bıylǵy 10 aıdyń qorytyndysy boıynsha Jetisý oblysynda tirkelgen kólik apatynyń basym bóligi Taldyqorǵan qalasynda bolǵan. Oblys ortalyǵynda bir jyldyń ishinde jol-kólik oqıǵasy shamamen 3 ese ósken. Máselen, ótken jyly 91 apat tirkelse, bıyl 250 den asqan. Qaza tapqandar sany azaıǵanmen, zardap shekkender kóp. Al, Panfılov pen Kóksý aýdandarynda kólik apatynan qaza tapqandar sany artqan.
Jetisý oblystyq polıtsııa departamentiniń dereginshe, 2024 jyldyń 10 aıynda jyldamdyqty shekten tys asyrý sebebinen — 224 jol apaty tirkelip 56 adam kóz jumǵan. Sonymen qatar, jaıaý júrginshilerdiń nemese jol qozǵalysyna qatysýshylardyń qozǵalys erejelerin buzýynan — 34, qarsy qozǵalys nemese basyp ozý erejelerin buzýdan 24 jol kólik oqıǵasy tirkelgen. Eki aýdanda qaza tapqandar sany artqan. Byltyrǵy jylmen salystyrǵanda Alakól aýdanynda 11-den 16-ǵa deıin (5) jáne Kerbulaq aýdanynda 8-den 16-ǵa (8) deıin ósken.
«Atalǵan aýdandarda adam ólimimen JKO ósýiniń taǵy bir sebebi, QAPBB bastyqtarymen osy aýmaqta qyzmet atqaratyn Patrýldik polıtsııa batalon qyzmetkerleri jáne onyń basshylarymen durys sharalar qabyldamaýynan bolyp otyr. Ólimmen aıaqtalǵan JKO-nyń árbir deregi boıynsha qyzmettik tergeý júrgizilip, kináli tulǵalar men olardyń basshylary barlyǵy 25 qyzmetker qatań tártiptik jaýaptylyqqa tartyldy, qyzmetten bosatylǵan joq» — dedi baspasóz alańynda baıandama jasaǵan jergilikti polıtsııa qyzmeti basqarmasynyń bastyǵy, polıtsııa polkovnıgi Qaısar Muhmetov.
Oblys aýmaǵynda kólik apatynyń aldyn alý maqsatynda apta saıyn juma, senbi jáne jeksenbi kúnderi jol qozǵalysy qaýipsizdigi boıynsha jedel -profılaktıkalyq jáne reıdtik is-sharalar ótkiziledi. Qazirgi ýaqytta 3 qyzmettik avtokólikte «Ekin-Patrol» avtomatty tirkeý júıesi qosylǵan jyldamdyq ólshegishter ornatylyp, qyzmette qoldanylýda.
Onyń kómegimen jyldamdyqty asyrý boıynsha 15 304 derek anyqtalyp, júrizýshilerge 266 mln 377 myń teńge aıyppul salynǵan. Sonymen qatar, 2024 jyldyń 14 — shildesinen bastap 216 «SERGEK» avtomatty bekitý júıesiniń kameralary ornatylǵan. Balalar qaýipsizdigi úshin mektepter men mektepke deıingi mekemelerdiń janyndaǵy jaıaý júrginshiler ótkelderinde 100-ge jýyq balalar maketi qoıyldy.Eske salaıyq buǵan deıin Jetisýda 30 jyldan beri jóndelmegen jolǵa asfalt tóselgenin jazǵanbyz.
