Jetisýdan tabylǵan ortaǵasyrlyq qalaǵa áli saraptama jasalǵan joq
TALDYQORǴAN. KAZINFORM – Qazaqstandyq zertteýshiler Jetisý óńirinen buryn belgisiz bolyp kelgen ortaǵasyrlyq qalanyń orny bolýy yqtımal jańa arheologııalyq nysan tapqanyn habarlady.
– Búgingi kún beker ótken joq – biz buryn tek jazba derekterden ǵana belgili bolǵan ortaǵasyrlyq qalanyń ornyn taptyq dep oılaımyz. Arheologtar bul týraly habardar, - delingen petroglıfter zertteýshi toptyń ókili Olga Gýmırovanyń jolkúndeligindegi jazbada.
Sonymen qatar bul nysan alǵash ret bir karer aýmaǵynda baıqalǵan. Ǵalymdar jer betinen shyǵyp turǵan kúıdirilgen kirpish pen qabyrǵa qaldyqtaryn, sondaı-aq ishinara saqtalǵan munarany anyqtaǵan. Aldyn ala boljam boıynsha, qala XIII ǵasyrdaǵy mońǵol shapqynshylyǵy kezinde órtelip, qıratylǵan.
Zertteýshilerdiń aıtýynsha, bul arheologııalyq keshen kólemi men mańyzdylyǵy jaǵynan Talhız nemese Qoılyq qalashyǵyna teń.
– Jetisý oblysynyń ákimdigine qutty bolsyn aıtamyz – endi Uly Jibek jolynyń boıynda taǵy bir tarıhı nysan bar. Ókinishke qaraı, qalashyqtyń bir bóligi karermen búlingen, al keı tustary zańsyz qoqys alańyna aınalǵan, - deıdi zertteýshiler.
Osy máselege qatysty KAZINFORM tilshisi Álkeı Marǵulan atyndaǵy Arheologııa ınstıtýtyna habarlasyp, jaǵdaıdyń mán-jaıyn anyqtaýǵa tyrysty.
Atalǵan derek boıynsha túsinikteme bergen atalǵan ınstıtýttyń ǵylymı qyzmetkeri Aleksandr Gorıachev Jetisý aımaǵynyń ǵylymı qyzyǵýshylyq týdyratyn aýmaq ekenin atap ótti. Onyń aıtýynsha, bul óńirde ol ınstıtýt arheologııalyq zertteý jumystaryn sońǵy 30 jyl boıy júıeli túrde júrgizip keledi.
– Iá, biz bul mańnan tabylǵan kirpish qaldyqtary týraly habardarmyz. Alaıda qazirgi ýaqytta bul nysanǵa qatysty resmı arheologııalyq saraptama jasalǵan joq. Sáıkesinshe, ol týraly naqty ǵylymı tujyrym aıtý erte. Fotosýretterge qaraǵanda, tabylǵan kirpishter ortaǵasyrlyq standarttarǵa sáıkes kelmeıdi, - deıdi A. Gorıachev.
Sonymen qatar ol bıyl tamyz aıynyń sońyna qaraı osy aýmaqta keshendi ǵylymı zertteý jumystary júrgiziletinin atap ótti.
Eske sala keteıik, Jetisýda saq dáýiriniń qorǵandary zańsyz qazylyp, búlingenin jazǵanbyz.