Jetisýdan Batys Qazaqstanǵa deıin: 13 tamyzda partııalar óńirlerde qandaı jumystar atqardy
ASTANA. KAZINFORM — 13 tamyzdaǵy saılaýaldy kún partııalardyń dástúrli kezdesýlerden shyǵyp, óndiris, aýyl sharýashylyǵy, medıtsına, áleýmettik qoldaý jáne ekologııa máselelerin tikeleı kótergenin kórsetti. Úmitkerler zaýyttar men egistikterde, medıtsınalyq jáne áleýmettik nysandarda, sondaı-aq turǵyndarmen kezdesýlerde naqty máselelerdi talqylady.
«Ádilet» partııasynyń respýblıkalyq shtaby partııa lıderi Aıbek Dádebaımen birge Jetisý oblysynda birqatar kezdesý ótkizdi. Taldyqorǵanda energetıkalyq ınfraqurylymǵa arnalǵan bólshekter shyǵaratyn «DENK» JShS zaýytynda ımportqa táýeldilikti azaıtý jáne otandyq óndirýshiler úshin qosylǵan qun salyǵyn qaıtarý rásimin jeńildetý máseleleri talqylandy. Eskeldi aýdanyndaǵy qyzylsha alqabynda agrarshylardy qoldaý sharalary sóz boldy. Odan keıin shtab Almaty oblysyndaǵy jumysyn jalǵastyrdy. «Galanz Bottlers» AQ kásipornynda bıznestiń jumysshylar aldyndaǵy áleýmettik jaýapkershiligi talqylandy. Qonaevta jumyspen qamtý, ınfraqurylym, bızneske túsetin salyq júktemesi jáne balalardyń quqyqtaryn qorǵaý máseleleri boıynsha qoǵam ókilderimen kezdesý ótti.
Oral qalasynda Jalpyulttyq sotsıal-demokratııalyq partııanyń kandıdaty Anargúl Ábenova aýtızm spektri buzylǵan jáne DTsP dıagnozy bar balalardy qosa alǵanda, múmkindigi shekteýli balalardyń ata-analarymen kezdesti. Qatysýshylar medıtsınalyq kómek, ońaltý jáne áleýmettik qoldaýdyń qoljetimdiligin, sonyń ishinde az qamtylǵan otbasylarǵa tegin qyzmet kórsetetin iri ońaltý ortalyǵyn qurý múmkindigin talqylady. Aqmola oblysynyń Bulandy aýdanynda kandıdattar Іlııas Janǵalı men Arý Alshynbaı Makınsk turǵyndarymen ashyq dıalog ótkizdi. Kezdesýde joldar, sýmen jabdyqtaý, medıtsınalyq qyzmet pen bilimniń qoljetimdiligi, jastar men zeınetkerlerdi qoldaý máseleleri kóterildi.
«Baıtaq» partııasy ekologııalyq baǵyttaǵy birneshe is-shara ótkizdi. Kandıdat Sáýle Qamytbekova ArayDent stomatologııalyq klınıkasynyń ujymymen kezdesti. Qatysýshylar qorshaǵan ortanyń lastanýynyń aýyz qýysynyń densaýlyǵyna yqtımal áserin talqylady. Aqtóbe oblysynda partııa bıznes ókilderi men ekologtardyń qatysýymen aǵyn sýlardy tazartý jáne qaıta paıdalaný tehnologııalaryna arnalǵan dóńgelek ústel ótkizdi. Almatyda kandıdat Vladımır Martel № 80 mekteptiń pedagogıkalyq ujymymen kezdesti. Kezdesýde ekologııalyq tárbıe jáne muǵalimderdi áleýmettik qoldaý máseleleri talqylandy. Sondaı-aq partııa Soltústik Qazaqstan oblysynyń Petropavl qalasy men Qaraǵandy oblysynyń Glýbokoe aýdanynda, Temirtaýda, sondaı-aq Shymkentte turǵyndarmen kezdesýler ótkizdi.
Astanada Qazaqstannyń Halyq partııasynyń «Áleýmettik Qazaqstan» atty alǵashqy kongresi ótti. Onda partııa tóraǵasy Nursultan Shoqanov sóz sóıledi. Ol sotsıalızmdi teń múmkindikterdi qamtamasyz etý joly retinde qarastyratynyn, al qoǵamnyń ádildikke degen suranysyn eń aldymen azamattardyń ómir súrý sapasyn arttyrýmen baılanystyratynyn atap ótti. Shymkentte kandıdattar qalalyq № 2 aýrýhananyń medıtsına qyzmetkerlerimen kezdesti. Qatysýshylar dárigerlerdiń mártebesi men áleýmettik qamsyzdandyrylýyn talqylady. Kandıdat Lázzat Aqtaeva densaýlyq saqtaý máselelerine qatysty pikir bildirip, JSDP baǵdarlamasynyń tıisti bólimin synǵa aldy. Partııa Jambyl, Abaı, Batys Qazaqstan jáne Shyǵys Qazaqstan oblystaryndaǵy eńbek jáne medıtsına ujymdarymen de kezdesýler ótkizdi.
Halyqaralyq jastar kúnine oraı «Aýyl» partııasy 350-den astam adam qatysqan «Taza Aýyl» ekologııalyq is-sharasyn ótkizdi. Oǵan partııa tóraǵasy Qaırat Aıtýǵanov ta qatysty. Qatysýshylar Qaınar-Bórjar bulaǵynyń mańyn tazalady. Partııanyń málimetinshe, saılaýaldy naýqan aıasynda elimizdiń óńirlerinde osyndaı 100-ge jýyq aktsııa ótkizilgen. Mańǵystaý oblysynda partııanyń jas belsendileri Kaspıı teńiziniń jaǵalaýynda aktsııa uıymdastyrdy.
«Aq jol» partııasynyń tóraǵasy Danııa Espaeva bastaǵan delegatsııa Abaı oblysyndaǵy «Semeı tsement zaýyty» JShS eńbek ujymymen kezdesti. Kezdesýde otandyq óndiris pen kásipkerlikti qoldaý máseleleri talqylandy. Sol kúni partııa óńirlerge qatynaıtyn poıyzyn jolǵa shyǵardy. Alǵashqy aıaldama Pavlodar stantsııasynda boldy. Onda Danııa Espaeva men shtab músheleri jolaýshylarmen ashyq dıalog ótkizdi.
«Respublica» partııasynyń ókilderi Oraldaǵy «Kýbleı» JShS et óńdeý kásipornyna bardy. Partııa 2023 jylǵy oqıǵany eske saldy. Sol kezde onyń basshylyǵynyń ótinishterinen keıin Densaýlyq saqtaý mınıstrligi sanıtarııalyq talaptardy qaıta qarap, kásiporynnyń jabylý qaýpine qaramastan jumysyn jalǵastyrýyna múmkindik bergen bolatyn. Sondaı-aq Oralda partııa ókilderi 70 jyldan astam ýaqyt jumys istep kele jatqan «OralAgroRemmash» AQ mashına jasaý zaýytynyń ujymymen kezdesti. Kezdesýde ónerkásipti qoldaý, salyq reformasy jáne kadr saıasaty talqylandy. Túrkistanda partııa ókili medıtsınalyq keshen salýǵa shamamen 9 mlrd teńge jeke ınvestıtsııa tartylǵanyn habarlady.
Osylaısha, 13 tamyzdaǵy saılaýaldy naýqan kásiporyndar men aýyl sharýashylyǵy nysandaryndaǵy kezdesýlerden bastap ekologııalyq aktsııalar, ashyq dıalogtar men partııalyq kongreske deıingi túrli formatta ótti. Kún boıy naýqanǵa qatysýshylar óndiris, aýyl sharýashylyǵy, jumyspen qamtý, medıtsına, áleýmettik qoldaý, ınfraqurylym jáne ekologııa máselelerin talqylady.
Buǵan deıin Qasym-Jomart Toqaev Ortalyq saılaý komıssııasynyń tóraǵasy Nurlan Ábdirovti qabyldaǵanyn jazǵanbyz. Toqaev saılaýdy ashyq ári teń jaǵdaıda ótkizýdi tapsyrdy.
