Jetisýdaǵy tuńǵysh jańa formattaǵy kitaphana Saryózekte qoldanysqa berildi

Joba Memleket basshysynyń tapsyrmasyna sáıkes iske asyryldy. Kerbulaq aýdanynyń Saryózek aýylynda ornalasqan kitaphananyń ashylýyna oblys ákimi Beıbit Isabaev qatysty.

Aýdan turǵyndaryn jańa nysannyń ashylýymen quttyqtaǵan oblys basshysy aýyldyq eldi mekende zamanaýı jańa kitaphananyń ashylýy Jetisý óńiriniń rýhanı ómirindegi aıtýly jańalyq ekenin atap ótti.

— Bul — kitap oqý mádenıetin damytý jáne zamanaýı kitaphana keńistikterin qalyptastyrý týraly Memleket basshysynyń tapsyrmasyn óńirde iske asyrýdyń alǵashqy bastamasy. Jańa kitaphanada kitap oqýǵa ǵana emes, tsıfrlyq resýrstardy paıdalanýǵa, jan-jaqty izdenýge, túrli mádenı jáne qoǵamdyq is-sharalar ótkizýge barlyq jaǵdaı jasalǵan. Kitaphanaǵa salynǵan ınvestıtsııa — eń aldymen adam kapıtalyna, ulttyń ıntellektýaldyq áleýetine jasalǵan ınvestıtsııa. Bul rette osy kıeli ordadan bilimdi, sanaly, tárbıeli, kitapsúıer urpaqtyń qalyptasyp shyǵatynyna senimdimiz. Jańa nysan osyndaı ıgi maqsattarǵa qyzmet etip, óńirdiń rýhanı shamshyraǵyna aınalsyn! — dedi B. Isabaev.

Munan soń jınalǵan kópshilik kitaphananyń ishin aralap kórdi. Sonyń ishinde májilis zalyn, oqý zalyn jáne balalar bólimin aralap kórdi.

Kitaphana dırektory Gúlmıra Ahanqyzynyń aıtýynsha, jańa kitaphananyń kitap qory 53 myńnan asady. Ǵımarattyń basty ereksheligi — munda birneshe oqyrman zalynyń bolýy, atap aıtqanda mektep jasyna deıingi, mektep jasyndaǵy balalarǵa, eresekterge arnalǵan arnaıy oqyrman zaldary qarastyrylǵan. Sonymen qatar medıatekasy bar aqparattyq-anyqtamalyq zal, kóbeıtý zerthanasy, aýqymdy kitap qoımasy ornalasqan. Qazirgi tańda kitaphana oqyrmandarynyń sany shamamen 5570 adam.

Jańa kitaphana ǵımaratynyń aýmaǵy 1620 sharshy metr. Kitaphanada oqyrmandarǵa qolaıly jaǵdaı jasalyp, zamanaýı talaptarǵa saı jabdyqtalǵan.

Birinshi qabatta kitaphananyń negizgi qyzmettik jáne oqý zaldary ornalasqan. Munda kitap qoryn zamanaýı talaptarǵa saı saqtaýǵa jáne oqyrmandarǵa elektrondy formatta usynýǵa múmkindik beretin skanerleý jáne tsıfrlandyrý kabıneti bar. Sondaı-aq kompıýtermen jáne ınternetpen jabdyqtalǵan mýltımedıa zaly jumys isteıdi. E-gov portaly arqyly ózine-ózi qyzmet kórsetý buryshy qarastyrylǵan.

— Biregeı zaldardyń biri — 30 oryndyq ólketaný zaly. Munda ólkeniń tarıhy men mádenıeti, Kerbulaq aýdanynan shyqqan belgili tulǵalar týraly keń kólemde aqparat beretin kitap materıaldary qoıylǵan. Sondaı-aq bul zalda aýdannyń tarıhı-mádenı murasyn saqtaýda mańyzdy orny bar sırek kezdesetin kitaptar toptamasy saqtalǵan. Munyń bári aýdan turǵyndary men qonaqtarynyń ıgligi úshin usynylyp otyr, — dedi G. Ahanqyzy.

Kitaphananyń ekinshi qabatynda kitaphananyń balalar bólimi ornalasqan. Munda ınternetke qosylǵan, kompıýtermen jabdyqtalǵan ІT-zal bar. Sondaı-aq 56 oryndyq oqý zalynda balalardyń jas erekshelikterine saı túrli taqyryptyq kitap kórmeleri uıymdastyrylǵan. Bul olardyń kitap oqýǵa degen qyzyǵýshylyǵyn arttyra túsedi. Úıirmeler ótkizý úshin «Balaýsa» oqý keńistigi jáne balalardyń paıdaly ýaqytyn uıymdastyrýǵa arnalǵan kovorkıng ortalyǵy qurylǵan. Sonymen qatar ekinshi qabatta túrli mádenı is-sharalardy ótkizýge jaǵdaı jasalǵan akt zaly ornalasqan.

Balalar bóliminiń kitap qorymen tanysqan oblys basshysy ony aldaǵy ýaqytta jańa qundylyqtarǵa negizdelgen jańa ádebıetpen tolyqtyrý kerek ekenin aıtty. Sol sııaqty «Balalardyń IT zalyna» ınternetti paıdalanyp, balalarǵa álemniń kez kelgen elindegi kitaphananyń oqyrmany bola alatyndaı múmkindikti úıretetin mamandardy arnaıy tartýdy tapsyrdy.

Mektep oqýshylary kitaphananyń oqý zalynda kitap, bilim týraly qazaq qalamgerleriniń óleńderin oqydy.

Eske salsaq, buǵan deıin aýdandyq kitaphana men balalar kitaphanasy aýyldyq ákimdik ǵımaratynda jáne Ábiken Sarybaev atyndaǵy aýdandyq mádenıet úıiniń ishinde otyrǵan bolǵan.

Jalpy, óńirde 150 kitaphana bar. Olarda 128 klýb pen úıirmeler, 29 kovorkıng ortalyǵy jumys isteıdi. Oblys qurylǵaly beri kitaphanalardaǵy kitap qorynyń sany 2,8 mıllıonnan asty.