Jetisýdaǵy Raıkól: adam batpaıtyn kóldiń syry nede
ASTANA. KAZINFORM – Jetisý oblysynyń Aqsý aýdanyndaǵy Jalqum shóliniń qaq ortasynda ornalasqan Raıkól nemese Jumaq kólderi óziniń erekshe tabıǵı qasıetterimen tanymal. Sýdyń tuzdylyǵy óte joǵary bolǵandyqtan, bul kóldi Qazaqstannyń Óli teńizine balaıdy.
Jumaq kóline aparar jol Jalqum shóliniń qumdy alqaptary men sekseýil ósken aýmaqtar arqyly ótedi. Shóldiń qaq ortasynda ornalasqan kól kógildir sýymen jáne aq tuzdy jaǵalaýymen erekshelenedi.
Kóldiń basty ereksheligi – sýyndaǵy tuzdyń óte joǵary kontsentratsııasy. Sonyń áserinen sýdyń tyǵyzdyǵy artqandyqtan adam sý betinde erkin qalqyp tura alady. Mamandar joǵary mıneraldanǵan sýda 15-20 mınýttan artyq bolmaýǵa keńes beredi.
Tuzdy kólderdiń dál janynda tuşy kólder ornalasqan. Sondyqtan shomylǵannan keıin týrıster denesindegi tuzdy sol jerde-aq shaıyp kete alady.
Kóldiń erekshe túsi mıneraldardyń ǵana emes, sondaı-aq Artemia salina usaq shaıanshalary men arnaıy baldyrlardyń áserinen qalyptasady. Jyl mezgiline, kún sáýlesiniń túsý buryshyna jáne mıkroaǵzalardyń belsendiligine qaraı sý kógildir, jasyl nemese qyzǵylt-sary túske enedi.
Jergilikti turǵyndar Raıkól ataýyna baılanysty kóne ańyzdy búginge deıin saqtap keledi. Ańyz boıynsha, Raıhan esimdi qyz aýyr dertke shaldyǵyp, Jalqum shóline ketedi. Tuzdy kólge batyp ólmek bolǵanymen, sýdyń kótergish kúshi ony jaǵaǵa qaıta-qaıta shyǵaryp otyrǵan. Keıin kóldiń tuzdy sýy men emdik balshyǵynyń arqasynda saýyǵyp, elge oralǵan qyzdyń qurmetine kól Raıkól atalǵan.
Sondaı-aq Ekinshi dúnıejúzilik soǵys jyldary bul mańdaǵy áskerı gospıtalda sarbazdardy tuzdy sý men emdik balshyqpen emdeý tájirıbesi qoldanylǵany aıtylady.
Raıkóldiń emdik balshyǵy tabıǵı SPA retinde keńinen paıdalanylady. Týrıster ony býyndaryna jáne terisine jaǵyp, kepkennen keıin kól sýymen shaıyp tastaıdy. Bul balshyqtyń qabynýdy azaıtýǵa, býyn men omyrtqadaǵy aýyrsynýdy jeńildetýge, bulshyqet sharshaýyn basýǵa jáne teriniń jaǵdaıyn jaqsartýǵa kómektesetini aıtylady.
Raıkólde týrıstik ınfraqurylym joq. Kól Jetisý oblysynyń Aqsý aýdanynda ornalasqan. Almatydan shamamen 500 shaqyrym, Taldyqorǵannan 200 shaqyrym jerde. Sońǵy jol bóligi qum arqyly ótetindikten, jol talǵamaıtyn kólik qajet.
Mamandar saıahatqa shyǵarda jetkilikti mólsherde aýyzsý, kúnnen qorǵaıtyn quraldar, jabyq aıaq kıim, shatyr jáne avtonomdy demalysqa qajetti jabdyqtardy alyp júrýge keńes beredi. Sondaı-aq tabıǵı nysannyń biregeıligin saqtaý úshin qoqysty ózimen birge alyp ketýge shaqyrady.
Aıta keteıik, ShQO-daǵy jazǵy demalysqa arnalǵan eń úzdik 8 týrıstik baǵyt týraly mynaý siltemeden oqyńyz.
