Jetisýdaǵy mádenıet mekemelerine avtokólikterdiń kilti tabystaldy
TALDYQORǴAN. KAZINFORM – Táýelsizdik kúni qarsańynda Jetisý oblysynda jergilikti mádenıet mekemelerine avtokólikter berildi. Oblys ákiminiń atynan tehnıka kiltterin orynbasary Dıas Esdáýletov tabystady.
Taldyqorǵandaǵy ortalyq alańda ótken saltanatty sharada óńir basshysynyń orynbasary mádenıet qyzmetkerleriniń Jetisýdyń ónerin óristetýge, halyqtyń rýhanı damýyna qosyp otyrǵan úlesin erekshe atap ótti.
— Mádenıet salasy mamandarynyń alańsyz jumys isteýine jaǵdaı jasaý, mádenıet nysandaryn materıaldyq-tehnıkalyq jaǵynan júıeli túrde nyǵaıtý — bizdiń basty mindetimizdiń biri. Búgin salanyń tehnıkalyq bazasyn shaǵyn avtobýstarmen jáne júk kólikterimen tolyqtyryp otyrmyz. Bul kólikter mádenıet ujymdarynyń gastroldik saparlarǵa shyǵýyna, qajetti qural-jabdyqtar men dekoratsııalardy tasymaldaýyna, túrli festıval, baıqaýlarǵa qatysýyna múmkindik týǵyzyp, jumys sapasyna oń áser etedi dep senemiz, — dedi Dıas Esdáýletov mekeme basshylaryna avtokólik kiltterin tapsyrdy.
Atap ótsek, osy kúni oblystaǵy 8 aýdandyq, 2 qalalyq mádenıet úılerine, S. Seıfýllın atyndaǵy oblystyq ámbebap kitaphanasy, oblystyq arhıv, Kórkemsýret galereıasy men Halyq shyǵarmashylyǵy ortalyǵyna jalpy sany 13 Gazel, 1 júk kóligi berildi.
Jańa tehnıkaǵa ıe bolǵan mekeme ujymdarynyń atynan Alakól aýdandyq Zeınep Qoıshybaeva atyndaǵy mádenıet úıiniń dırektory Otan Smaǵulov sóz sóılep, rızashylyǵyn bildirdi.
— Búgin Jetisý óńiriniń mádenıet salasy qyzmetkerleri úshin tarıhı kún deýge bolady. Sala nysandaryna bir kúnde osynsha kólik berý oqıǵasy alǵash ret bolyp tur. Bul — ulttyq qundylyqtardy nasıhattap júrgen azamattarǵa kórsetilip otyrǵan qamqorlyq, bizge shyǵarmashylyq serpilis beretin ıgilikti is. Bir ǵana bizdiń Alakól aýdanynda 4 jańa mádenıet nysany salynyp jatyr, sonyń bireýi jýyrda paıdalanýǵa beriledi, 3-eýi kelesi jyldyń úlesinde. Aldaǵy ýaqytta da rýhanııat úshin eseli eńbek ete beremiz. Jetisý óńiriniń óneri men mádenıeti jasaı bersin, — dedi ol.
Atap ótsek, bul ıgi shara bıyl ekinshi jyl qatarynan ótkizilgen «Jer jannaty — Jetisý» oblystyq televızııalyq baıqaýynyń marapattaý saltanatymen jáne gala kontsertimen jalǵasty.
Jalpy, Jetisý oblysy qurylǵannan beri mádenıet salasynyń ınfraqurylymy 36,2% jańartyldy. Sońǵy úsh jylda sala mekemeleriniń materıaldyq bazasyn nyǵaıtýǵa bıýdjetten 1 mlrd teńgeden astam qarajat bólinip, mýzykalyq aspaptar, sahnalyq kıimder, kompıýterlik jabdyqtar, basqa da qajettilikter satyp alynǵan. Qazir oblysta 300-den astam mádenıet, arhıv mekemeleri jumys isteıdi.