Jetisýdaǵy erekshe ferma: 1,5 myńnan astam esek ne úshin ósirilip jatyr
TALDYQORǴAN. KAZINFORM – Jetisý oblysynyń Qaratal aýdanyndaǵy esek ósiretin erekshe ferma áleýmettik jelilerde qyzý talqylanyp jatyr. Jeli qoldanýshylary munda Qazaqstannyń ár óńirinen ákelingen janýarlar keıin kosmetıka óndirisine paıdalaný úshin Qytaıǵa jóneltiledi degen aqparat taratqan.
Osyǵan baılanysty Kazinform agenttiginiń tilshisi Jetisý oblystyq aýyl sharýashylyǵy basqarmasynan resmı túsinikteme aldy.
Basqarma málimetinshe, atalǵan fermadaǵy barlyq janýar qoldanystaǵy zańnama talaptaryna sáıkes esepke qoıylyp, resmı tirkelgen.
Áleýmettik jelilerde taraǵan aqparatqa sáıkes, fermaǵa esekter Qazaqstannyń ártúrli óńirinen jetkizilip, keıin Qytaıǵa eksporttalady degen boljam aıtylǵan. Alaıda bul aqparattyń resmı rastalǵan deregi ázirge joq.
Vedomstvo ókilderi esekterdi kútip-baǵý men tirkeý qoldanystaǵy zańnamamen retteletinin atap ótti.
— Qazaqstan Respýblıkasy Aýyl sharýashylyǵy mınıstriniń 2015 jylǵy 30 qańtardaǵy №7-1/68 buıryǵymen bekitilgen aýyl sharýashylyǵy janýarlaryn birdeılendirý qaǵıdalaryna sáıkes, esekter iri qara, usaq mal, jylqy, túıe jáne shoshqamen birge mindetti túrde sáıkestendirilip, tirkelýge jatady, — dep habarlady basqarmadan.
Aýyl sharýashylyǵy janýarlaryn birdeılendirýdiń memlekettik aqparattyq júıesindegi derekke sáıkes, Qaratal aýdanyndaǵy Úshtóbe qalasyna jaqyn ornalasqan Eskeldi bı aýylynda eki iri esek toby resmı tirkelgen.
Atap aıtqanda, Jixiang International Trade Import & Export Co., Ltd jaýapkershiligi shekteýli seriktestiginiń esebinde 1 199 bas esek bar. Taǵy 351 janýar basqa bir jeke tulǵanyń atyna tirkelgen. Osylaısha bir ǵana eldi mekende resmı túrde 1 550 esek esepke alynǵan.
Sondaı-aq basqarmada bıyl tirkelgen barlyq janýarǵa mindetti veterınarııalyq-profılaktıkalyq is-sharalar aıasynda sibir jarasyna qarsy vaktsına salynǵanyn málimdedi.
Sonymen birge vedomstvo esekterdiń naqty qandaı maqsatta ósiriletinin jáne olardyń Qazaqstannan tys jerlerge eksporttalatynyn naqtylamady. Sondaı-aq janýarlardyń kosmetıka óndirisinde paıdalanylatynyn rastaıtyn resmı aqparat joq ekeni atap ótildi.
Osyǵan deıin ShQO-da ekologııalyq talaptardy buzǵan shoshqa fermasy jaýapqa tartylǵany týraly jazdyq.
