Jetisýdaǵy Altynkólde qutqarýshy qaza tapty

ASTANA. KAZINFORM — Jetisý oblysynyń Panfılov aýdanynda Altynkól kólinde júrgizilgen qutqarý operatsııasy kezinde óńirlik tótenshe jaǵdaılar departamentiniń qyzmetkeri qaza tapty.

TJD habarlaǵandaı, 2026 jyldyń 7 naýryzynda qyzmet pýltine Atameken aýyldyq okrýgindegi Altynkól kólinde balyq aýlaý kezinde muz jarylǵany týraly habar túsken. Nátıjesinde bir er adam synyp, bólingen muzda qalyp, sý qoımasynyń ortasyna aǵyp ketken.

– Oqıǵa ornyna Jarkent qalasynyń № 11 órt bólimi qyzmetkerleri, Taldyqorǵan qalasynyń jedel-qutqarý jasaǵy, sondaı-aq QR TJM men Almaty oblysy TJD «Barys» respýblıkalyq qutqarý qyzmetiniń qutqarýshylary jiberilgen, — dep habarlady Tótenshe jaǵdaılar departamenti.

Alaıda qutqarý operatsııasy kezinde muz taǵy da jarylyp, qaıǵyly jaǵdaı bolǵan.

– Saldarynan Panfılov aýdany TJ bóliminiń № 11 órt bólimi qaraýyl bastyǵy, azamattyq qorǵaý maıory Damır Taranov qaza tapty. Ol oqıǵa ornynda bolyp, qutqarý jumystaryna qatysqan, - dep habarlady Jetisý oblystyq TJD.

Damır Taranov 1994 jyldyń 28 maýsymynda dúnıege kelgen. Ol azamattyq qorǵaý júıesinde kásibı qyzmetin 2012 jyly bastaǵan. 2016 jyldan bastap Panfılov aýdany men Qapshaǵaı qalasynyń órt bólimshelerinde ártúrli laýazymdarda jumys istep, órtke qarsy qyzmet organdarynda tájirıbe jınaǵan. Sońǵy jyldary Damır Taranov Jetisý oblysy Panfılov aýdanynyń № 11 órt bóliminde qyzmet atqarǵan.

Eske salsaq, osyǵan deıin Abaı oblysyndaǵy garnızonda áskerı qyzmetshi qaza tapqany habarlanǵan.