Jetisýda júk kólikterin zańsyz tirkep otyrǵan mamandandyrylǵan HQO qyzmetkerleri sottaldy
TALDYQORGAN. KAZINFORM — Jetisý oblysynda kólik quraldaryn zańsyz tirkeýge baılanysty rezonansty qylmystyq is boıynsha sot úkimi shyqty. 21 adam kináli dep tanyldy.
Іs fıgýranttary arasynda Almaty jáne Jetisý oblysynyń mamandandyrylǵan HQO qyzmetkerleri, ákimshilik polıtsııa ókilderi jáne deldaldar bar.
Úkim Jetisý oblysynyń qylmystyq ister jónindegi mamandandyrylǵan aýdanaralyq sotynda jarııalandy.
Іs materıaldaryna sáıkes, segiz sottalýshy qylmystyq shemany uıymdastyrǵan, al qalǵandary aldyn ala sóz baılasý arqyly iske qatysqan. Olar qujattardy qoldan jasap, memlekettik derekqorǵa jalǵan málimetter engizip, júk kólikterin zańsyz tirkeýmen aınalysqan.
Qylmystyq is 270 tomnan turady jáne Qylmystyq kodekstiń 206-baby 3-bóligi, 385-baby, 262-baby 3-bóligi jáne 361-baby boıynsha qaraldy.
Tergeý málimetinshe, 2020–2021 jyldary Almaty oblysynyń Qarasaı aýdanyndaǵy mamandyrylǵan HQO-da sottalýshylar shetelden ákelingen júk kólikterin zańsyz zańdastyrǵan. Deldaldar arqyly alynǵan aqsha úshin olar mindetti tólemderdiń tólengeni týraly túbirtekterdi qoldan jasap, kólik quraldaryn rásimdegen. Osylaısha 904 júk kóligi tirkelip, memleketke keltirilgen zalal 5,6 mlrd teńgeden asty.
Sonymen qatar, 2022 jylǵy 31 qazan men 2023 jylǵy 20 aqpan aralyǵynda dál osyndaı qylmystyq shema Jetisý oblysynyń Sarqan aýdanynda áreket etken. Uıymdasqan qylmystyq topty sottalýshylardyń biri basqarǵan. Onyń quramyna HQO qyzmetkerleri, ákimshilik polıtsııa ókilderi men deldaldar kirgen. Atalǵan kezeńde 481 kólik zańsyz rásimdelip, keltirilgen zalal 3,7 mlrd teńge bolǵan.
Jalpy alǵanda, memleketke keltirilgen shyǵyn 9 mlrd teńgeden asty.
Memlekettik aıyptaýshy prokýror Rústem Smaǵulov sottan sottalýshylarǵa 3 jyldan 14 jylǵa deıin bas bostandyǵynan aıyrý jazasyn taǵaıyndaýdy surady. Jábirlenýshi taraptyń ókilderi de qylmystyń aýqymy men saldarynyń aýyrlyǵyn atap ótip, prokýratýranyń ustanymyn qoldady.
Sot usynylǵan dáleldemelerdi zerdeleı kele, barlyq sottalýshyny kináli dep tanydy.
— Jasalǵan qylmystyń qoǵamdyq qaýiptiligi men sıpatyn eskere otyryp, sot 2 jyldan 12 jylǵa deıin bas bostandyǵynan aıyrý jazasyn taǵaıyndady, — dedi Jetisý oblysynyń qylmystyq ister jónindegi mamandandyrylǵan aýdanaralyq sotynyń tóraǵasy Baqyt Ermahanov.
Onyń aıtýynsha, sottalǵandar jazasyn qylmystyq-atqarý júıesiniń eń tómengi jáne ortasha qaýipsizdik deńgeıindegi mekemelerinde óteıdi. Úkim áli zańdy kúshine engen joq jáne 15 táýlik ishinde apellıatsııalyq tártippen shaǵymdanýǵa bolady.
Aıta ketelik, buǵan deıin Shymkentte polıtsııa basqarmasynyń burynǵy bastyǵy para alǵany úshin sottalǵan edi.