Jetisýda júk kólikteri avtomatty júıeden qashatyn jol jabyldy
ASTANA. KAZINFORM — Jetisý oblysynda aýyr júk kólikteri avtomatty salmaq baqylaý beketin aınalyp ótý úshin tehnıkalyq joldy paıdalanǵan. Prokýratýra zańsyz aınalma joldy japty.
«Saryózek — Kóktal» respýblıkalyq mańyzy bar avtojolynyń bir ýchaskesinde júk kólikteriniń avtomattandyrylǵan ólsheý stantsııasynan ótpeı júrgeni anyqtaldy. Tasymaldaýshylar aınalma jol retinde óndiristik qajettilikke arnalǵan tehnıkalyq joldy paıdalanǵan.
Bas kólik prokýratýrasynyń úılestirýimen «QazAvtoJol» fılıalynyń arnaıy tehnıkasy arqyly atalǵan joldar bógetteldi. Qazir júk kólikteri salmaq baqylaýynan avtomattandyrylǵan stantsııa kesheni arqyly ótip jatyr.
— Oqıǵaǵa baılanysty prokýratýra, kóliktik baqylaý ınspektsııasy jáne ákimshilik polıtsııa qyzmetkerlerinen vedomstvoaralyq jumys toby quryldy. Onyń jumysy aýmaqaralyq qaǵıdat boıynsha júrgiziledi. Sonymen qatar mobıldi salmaq ólsheý keshenderiniń sanyn kóbeıtý týraly sheshim qabyldandy. «QazAvtoJolmen» birlesip Qonaev qalasyna kireberiste avtomattandyrylǵan salmaq baqylaý júıesin ornatý máselesi de qarastyrylyp jatyr, — delingen vedomstvonyń baspasóz qyzmeti taratqan habarlamada.
Jyl basynan beri 22 myń tasymaldaýshy kólik quraldarynyń salmaq parametrlerin saqtamaǵany úshin ákimshilik jaýapkershilikke tartylǵan. Olarǵa jalpy 6 mlrd teńge aıyppul salynǵan.
Artyq salmaqpen kólik shyǵarýǵa múmkindik beretin kásiporyndar da jaýapkershilikke tartylyp jatyr. Osy kezeńde mundaı 363 sýbekt anyqtalǵan.
Eske salaıyq, buǵan deıin jazda el halqy qaı aqyly jolmen kóp júrgeni jaıly jazǵan edik.
