Jetisýda jol jóndeý kezinde 115 mln teńgeniń jer qoınaýy zańsyz óndirilgen
TALDYQORǴAN. KAZINFORM – Jetisý oblysynda «Almaty – Óskemen» avtomobıl jolyn kúrdeli jóndeý kezinde tas pen topyraqty zańsyz óndirý faktisi anyqtaldy. Memleketke keltirilgen zalal 115 mıllıon teńgeden asty, dep habarlaıdy Jetisý oblysynyń prokýratýrasy.
Oblystyq mamandandyrylǵan tabıǵat qorǵaý prokýratýrasynyń málimetinshe, merdiger uıym tıisti ruqsat qujattarynsyz taý betkeıinen tas pen topyraq óndirip, olardy jol qurylysyna negiz retinde paıdalanǵan.
Atalǵan fakti boıynsha Qazaqstan Respýblıkasy Qylmystyq kodeksiniń 334-baby 3-bóliginiń 3-tarmaǵy (jer qoınaýyn óz betinshe paıdalaný) boıynsha qylmystyq is tirkelip, sotqa deıingi tergep-tekserý júrgizilip jatyr.
Tergeý barysy Jetisý oblysy prokýratýrasynyń baqylaýyna alyndy. Óńirde ekologııalyq zańnama talaptarynyń saqtalýyn qamtamasyz etý jumystary júrip jatyr.
Osyǵan deıin Jetisý oblysynda 1,5 mlrd teńgelik altyn quramdy kendi zańsyz áketý áreketi toqtatylǵany týraly jazdyq.
