Jetisýda jyl basynan beri jol apatynan 116 adam kóz jumǵan

TALDYQORǴAN. KAZINFORM — Bıyl jyl basynan beri Jetisý oblysynda 945 jol-kólik oqıǵasy oryn alyp, saldarynan 116 adam qaza tapty. Oǵan qosa, 1667 adam jaraqat alǵan.

Byltyrǵy jylmen salystyrǵanda adam shyǵyny bar jazataıym oqıǵalardyń sany 58,5%, zardap shekkender sany 67,3% artqan. 

Balalar jaraqatynyń artýy erekshe alańdatyp otyr. On aıda 400 kámeletke tolmaǵan bala zardap shekken (ósim 53%), onyń 13-i qaıtys boldy.

— Bul jaǵdaı barlyq júrgizýshilerdiń erekshe nazaryn talap etedi. Tek birlesken kúsh-jigerdiń arqasynda ǵana jol-kólik oqıǵalarynyń sanyn azaıtyp, adamdardyń ómirin saqtap qalýǵa bolady, — dedi QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń Jetisý oblysy boıynsha departamenti basshysy Erlan Moldahmetov.

Jazataıym oqıǵanyń eń kóbi — Taldyqorǵanda tirkelgen. Munda 329 jol apaty boldy. Panfılov aýdanynda — 237, Alakólde — 72 jáne Eskeldi aýdanynda 74 oqıǵa tirkeldi. Jol-kólik oqıǵalarynyń kópshiligi eldi mekenderde (664), taǵy 243-i respýblıkalyq jáne oblystyq mańyzy bar joldarda oryn alǵan.

Oqys jaǵdaılardyń negizgi sebepterine jyldamdyqty arttyrý (184 jaǵdaı), jol belgilerin elemeý (202), jaıaý júrginshilerge jol bermeý (119), manevr jasaý erejelerin buzý (73) jatady.

Jyl basynan beri oblysta 247 jaıaý júrginshilerdi qaǵyp ketý deregi tirkeldi. Onda 6 adam qaza taýyp, 242 adam jaraqat alǵan. Osyndaı jaǵdaı boıynsha Taldyqorǵanda — 124, Panfılov qalasynda — 54, Eskeldide 20 oqıǵa tirkeldi.

Apattardyń kópshiligi qarbalas ýaqytta — tańǵy 7:00 men 9:00 arasynda jáne keshki ýaqytta 18:00-den 22:00-ge deıin oryn alady.

Aıta keteıik, qazir aımaqta mas kúıde kólik júrgizý deregi azaımaı tur. Osy ýaqytqa deıin 18 oqıǵa anyqtaldy.

Buǵan deıin Shyǵys Qazaqstan oblysynda jol apatynan 5 adam qaza bolyp, bir adam jaraqat alǵany týraly jazdyq.