Jetisýda jasóspirimderge qatysty qylmys 22,9 paıyzǵa ósken
TALDYQORǴAN. KAZINFORM — Atalǵan óńirde jasóspirimder arasyndaǵy quqyqbuzýshylyqtyń aldyn alý maqsatynda jyl basynan beri 2080 reıdtik is-shara ótkizilgen.
Bul týraly Kazinform aqparat agenttiginiń resmı saýalyna jaýap bergen Jetisý oblysy Polıtsııa departamenti habarlady.
— Atalǵan reıdter bilim berý organdarynyń ókilderimen birlesip júrgizildi. Onyń nátıjesinde 3257 quqyqbuzýshylyq deregi anyqtalyp, olardyń joly kesildi. Bul ótken jyldyń sáıkes kezeńimen salystyrǵanda 22,9 paıyzǵa kóp, — delingen departament jaýabynda.
Sondaı-aq Polıtsııa departamenti kámeletke tolmaǵandardyń túngi ýaqytta zańdy ókilderinsiz turǵyn úıden tys jáne oıyn-saýyq oryndarynda júrýiniń 2236 faktisi tirkelgenin habarlady.
— Atalǵan zańbuzýshylyqtarǵa jol bergen eresekter QR ÁQBtK-niń 442-babyna sáıkes ákimshilik jaýapkershilikke tartyldy, — dedi vedomstvo.
PD málimetinshe, ata-analyq mindetterin tıisinshe oryndamaǵan 579 zańdy ókil QR ÁQBtK-niń 127-baby boıynsha jaýapqa tartylǵan. Bul ótken jylmen salystyrǵanda eki esege jýyq ósimdi kórsetedi (2024 j. qańtar — mamyr aralyǵy — 289).
— Balalardyń túngi ýaqytta kóńil kóteretin oryndarda zańdy ókildersiz bolýyna jol bergen 16 fakti tirkelip, quqyq buzýshylar 132-bappen jaýapqa tartyldy, — dep naqtylady departament.
Sonymen qatar jyl basynan beri 44 jasóspirim ýaqytsha oqshaýlaý ortalyǵyna jetkizilgen. Olardyń 15-i qadaǵalaýsyz, 29-y ata-anasynyń qamqorlyǵynsyz qalǵandar.
— Kámeletke tolmaǵandardyń isteri jónindegi komıssııalarda 61 is qaralyp, nátıjesinde 14 ata-ana quqyǵynan aıyryldy, taǵy 14 ata-ananyń quqyǵy shekteldi, — delingen jaýapta.
Jasóspirimderdiń quqyqtyq saýatyn arttyrý maqsatynda bilim berý mekemelerinde 1409 quqyqtyq dáris oqylyp, buqaralyq aqparat quraldarynda 1350 maqala jarııalanǵan. Sonymen qatar oblys aýmaǵynda ata-analar men mektep ókilderiniń qatysýymen 30 semınar ótkizilgen.
— Oblys mektepteri men kolledjderinde 344 senim jáshigi ornatylyp, 510 jasyryn saýalnama júrgizildi. Oǵan 43 950 oqýshy qatysty, — dep qorytyndylady Polıtsııa departamenti.
Buǵan deıin, Qazaqstanda sońǵy bes jylda kámeletke tolmaǵandarǵa qatysty qylmys sany azaıǵanyn jazǵanbyz.