Jetisýda jarty tonnadan astam kıik múıizi zańsyz aınalymnan alyndy
ASTANA. KAZINFORM — Jetisý oblysynda 500 keliden astam kıik múıiziniń zańsyz aınalymǵa túsýine jol berilmedi, dep habarlaıdy ІІM baspasóz qyzmeti.
Jetisý oblysynda polıtsııa, prokýratýra jáne QR UQK Shekara qyzmetimen birlesip, janýarlar dúnıesi obektileriniń zańsyz aınalymynyń jolyn kesý baǵytynda jedel is-sharalar júrgizdi.
Іs-sharalar Panfılov aýdany aýmaǵynda ótkizildi. Nátıjesinde 6 kúdikti ustaldy.
Syrtqy belgileri boıynsha kıik múıizine uqsas 1,6 myńnan astam zat anyqtalyp, olardyń jalpy salmaǵy 500 keliden asatyny belgili boldy. Atalǵan zattardyń zańsyz aınalymǵa túsýine jol berilmedi. Osylaısha sırek kezdesetin janýarlardyń derıvattaryn zańsyz ótkizý arnasynyń joly kesilip, janýarlar dúnıesine keltirilýi múmkin zalaldyń aldyn alý qamtamasyz etildi.
— Atalǵan derek boıynsha sırek kezdesetin jáne joıylyp ketý qaýpi tóngen janýarlarmen jáne olardyń bólikterimen zańsyz aınalysý faktisi boıynsha sotqa deıingi tergep-tekserý bastaldy. Qazir oqıǵanyń barlyq mán-jaıy, ótkizý arnalary jáne ózge de qatysy bar tulǵalar anyqtalyp jatyr, — delingen habarlamada.
Vedomstvonyń málimetinshe, brakonerlik pen janýarlar dúnıesi obektileriniń zańsyz aınalymy faktilerin anyqtaý jáne jolyn kesý jumystary erekshe baqylaýda jáne júıeli túrde júrgiziledi.
Budan buryn Pavlodar oblysynda kıikterdiń sany bir jylda tórt ese ósip, 120 myńǵa jetkenin jazǵanbyz.
