Jetisýda Úsharal-Dostyq trassasynda bes kólik jol apatyna ushyrady

ASTANA. KAZINFORM — Jetisý oblysynda bes kólik jol apatyna ushyrady. Apat Úsharal-Dostyq avtojolynyń aýa raıynyń nasharlaýyna baılanysty ýaqytsha qozǵalys shektelgen ýchaskesinde boldy, dep habarlaıdy Kazinform tilshisi.

Aımaqtyq polıtsııa departamentiniń málimetinshe, atalǵan jol ýchaskesinde qozǵalys 2026 jylǵy 13 aqpannan 12:00-de bastap 17 aqpanǵa deıin 09:00-ge deıin ýaqytsha jabylǵan bolatyn.

— Polıtsııa qyzmetkerleri «Úsharal-Dostyq» avtojolynda bolǵan jol-kólik oqıǵasy boıynsha aldyn ala tergeý júrgizip jatyr. Aýa raıynyń nasharlaýyna baılanysty atalǵan jol ýchaskesinde ýaqytsha qozǵalys shektelgen, — dedi polıtsııadan.

Ornatylǵan shekteýge qaramastan, bes júrgizýshi qaýipsizdik talaptaryn elemeı, jabyq jol ýchaskesine shyqqan. Sonyń saldarynan kólikter soqtyǵysty.

Apat saldarynan alty adam medıtsınalyq mekemege jetkizildi. 

Sondaı-aq, polıtsııa resmı túrde jabyq jolǵa shyǵý ákimshilik jaýapkershilikke ákep soqtyratynyn eske saldy.

— QR Ákimshilik quqyq buzýshylyq týraly kodeksiniń 667-babyna sáıkes, resmı túrde jabyq jolǵa shyǵý jaýapkershilikke ákep soǵady, — dep atap ótti vedomstvo.

Quqyq qorǵaýshylar júrgizýshilerdi engizilgen shekteýlerdi qatań saqtap, ózderin jáne jol qozǵalysyna qatysýshylardy qaýipke ushyratpaýǵa shaqyrady.

Eske salsaq, buǵan deıin Aqmola oblysynda jol apatynda júrgizýshi kóliktiń ishinde qysylyp qalǵany habarlanǵan edi.