Jetisýda úsh jylda 712 myń gektar jer qaıta aınalymǵa engizildi

TALDYQORǴAN. KAZINFORM – Jetisý oblysynda 2022-2025 jyldary 1,3 mln gektar turaqty paıdalanylmaı jatqan aýyl sharýashylyǵy jerleri anyqtaldy. 712 myń ga jer qaıta aınalymǵa engizildi. Bul týraly oblys ákimi Beıbit Isabaev eseptik kezdesýinde aıtty. 

Óńir basshysynyń sózinshe, 603 myń gektar jer memlekettik menshikke qaıtaryldy, onyń ishinde aýyl sharýashylyǵy aınalymyna 431 myń gektar tartylǵan. Qalǵan 172 myń gektar jer kelesi jyldyń alǵashqy jartyjyldyǵynda aınalymǵa enedi. 

– Jetisý oblysy – agrarly aımaq. Bul salada óndirilgen ónimniń jalpy kólemi byltyr 3%-ǵa ósti. Bıyl ósim 5% bolady dep kútilip otyr. Jyl basynan beri aýyl sharýashylyǵyna 25 mlrd teńge ınvestıtsııa tartyldy. 2025-2027 jyldary oblystyń agroónerkásip kesheninde jalpy quny 94 mlrd teńgege 23 ınvestıtsııalyq jobany iske asyrý josparlanǵan, - dedi B. Isabaev Ortalyq kommýnıkatsııalar qyzmetinde ótken baspasóz máslıhatynda.

Spıker aýyl sharýashylyǵy ónimderin óńdeý úlesi 2023 jylmen salystyrǵanda 49%-dan 68%-ǵa deıin óskenin aıtty.

Aqsý qant zaýyty tolyq jańǵyrtylyp, qaıta iske qosyldy. Maıly daqyldardy qaıta óńdeıtin «Agrokompleks Jetisý Majıko», «Kóksý qant», «Jarkent krahmal-sirne» zaýyttarynyń qýattary ulǵaıtyldy.

Sonymen birge, oblysta jyl saıyn 100 myń tonnadan astam sút, 1,5 myń tonnaǵa deıin balyq óńdeledi. Qant qyzylshasyn egetin alań 3 ese artyp, 4,2 myń gektardan 12,2 myń gektarǵa jetti. Bıyl 490 myń tonna tátti túbir jınalyp, 87 myń tonna qant óndirý josparlanǵan.

Aıta keteıik, Jetisý oblysynda bıylǵy 10 aıda barlyq sala boıynsha ósim baıqalady. Óńirde 27 jańa óndiris ashylyp, myń jarym jumys orny quryldy.