Jetisýda túrmeden shyqqan azamattar jumyspen qamtylyp, úıli boldy

ASTANA. KAZINFORM — Jetisý oblysynda jazany óteýden shartty túrde merziminen buryn bosatylǵan azamattar baspanamen jáne jumyspen qamtyldy, dep habarlaıdy oblystyq prokýratýranyń baspasóz qyzmeti.

Jetisý oblysynyń prokýratýrasy qylmystyń aldyn alýdyń negizgi quraly retinde azamattardy áleýmettik beıimdeýge basymdyq beredi. Sonyń ishinde, Qaratal aýdanynyń prokýratýrasynyń úılestirýimen shartty túrde merziminen buryn bosatylǵan jáne túzelý jolyna túsken tulǵalardy qoldaý boıynsha naqty sharalar sátti iske asyryldy.

— Aýdan prokýratýrasynyń metsenattarmen jáne jergilikti atqarýshy organdarymen belsendi ózara is-qımylynyń nátıjesinde alty bala tárbıelep otyrǵan kópbalaly ana Sh.-nyń ómirlik mańyzdy máselesi sheshildi. Shartty túrde merziminen buryn bosatylǵan áıelge jeke menshik quqyǵymen abattandyrylǵan úsh bólmeli turǵyn úı berildi. Otbasyn turaqty baspanamen qamtamasyz etý kámeletke tolmaǵandardyń quqyqtaryn qorǵaýǵa jáne ananyń qoǵamǵa sátti beıimdelýine negiz boldy, — delingen habarlamada.

Sonymen qatar, aýdan prokýratýrasynyń bastamasymen shaǵyn bıznesti damytýǵa qoldaý kórsetildi. Probatsııa qyzmetiniń esebinde turǵan azamat K.-ǵa dánekerleý tsehyn ashý úshin 1,5 mln teńgeden astam somaǵa memlekettik qaıtarymsyz grant bólindi. Jeke isin ashý azamatqa qoǵamǵa zańdy túrde aralasýǵa jáne otbasyn turaqty tabyspen qamtamasyz etýge múmkindik berdi.

Jetisý oblysynda zańdylyqty qamtamasyz etý jáne quqyq buzýshylyqtyń aldyn alý jumystary júıeli negizde jalǵasady.

Buǵan deıin Astanada sottalǵandar normadan tys jumys istep, eńbekaqysy ýaqtyly tólenbegenin jazǵanbyz.