Jetisýda tynyshtyqty buzǵan turǵyndar 40 mıllıon teńgeden astam aıyppul tóledi

TALDYQORǴAN. KAZINFORM — Jetisý oblysynda túngi ýaqytta tynyshtyqty buzǵan turǵyndar 40 mıllıon teńgeden astam aıyppul tóledi. Bul qomaqty soma ótken jyly tirkelgen 3 myńǵa jýyq zań buzýshylyq boıynsha óndirilgen.

Kóbinese kópqabatty úılerdiń turǵyndarynan shaǵym túsedi. Olar beımezgil ýaqytta mýzykanyń daýysyn shekten asyryp, shýly keshter uıymdastyrǵan, sondaı-aq túnde jóndeý jumystaryn júrgizgen.

Zań talaptaryna sáıkes, tynyshtyq rejımi jumys kúnderi saǵat 22.00-den 9.00-ge deıin, demalys jáne mereke kúnderi 23.00-den 10.00-ge deıin. Osy ýaqyt aralyǵynda turǵyn jaılarda jáne oǵan jaqyn aýmaqtarda shý shyǵarýǵa tyıym salynady.

Bıylǵy jyldyń basynan beri beımezgil ýaqytta azamattardyń tynyshtyǵyn buzǵan 200-den astam adam ákimshilik jaýapkershilikke tartylǵan.

Jetisý oblystyq prokýratýrasy qoǵamdyq múddelerdi qorǵaý bóliminiń basshysy Murat Nurmuhan belgilengen tártipti saqtamaý ákimshilik jaýapkershilikke ákep soǵatynyn túsindirdi.

— Alǵash ret buzǵany úshin eskertý nemese 5 aılyq eseptik kórsetkish kóleminde aıyppul salynady. Bir jyl ishinde qaıtalansa, 10 aılyq eseptik kórsetkish kóleminde aıyppul arqalaıdy. Kásipkerlik nysandar úshin jaza qatańyraq, — dedi ol.

Prokýror tynyshtyqty saqtaý tek zań talaby ǵana emes, kórshiler arasyndaǵy ózara syılastyqtyń belgisi ekenin atap kórsetti. Zańbuzýshylyqtar anyqtalǵan jaǵdaıda azamattarǵa 102 nómirine nemese ýchaskelik polıtsııa qyzmetkerine habarlasý usynylady.

Byltyr Jambyl oblysynda mas kúıdegi turǵyn qolyn qaıtarǵan kórshisine pyshaq suǵyp alǵan edi.