Jetisýda sý tasqyny kezeńi ádettegiden erte bastaldy
TALDYQORǴAN. KAZINFORM — Jetisý oblysy aýmaǵynda gıdrologııalyq jaǵdaı turaqty. Alaıda bıyl óńirde sý tasqyny kezeńi ádettegiden erte bastaldy. Buǵan aýa temperatýrasynyń kúrt kóterilýi men jaýyn-shashyn sebep bolǵan.
Jetisý oblysy TJD tótenshe jaǵdaılardyń aldyn alý basqarmasynyń bastyǵy Rınat Tazabekovtiń aıtýynsha, qardyń qarqyndy erýi 4 aqpanda bastalǵan. Jalpy óńirde 49 sý basý qaýpi bar eldi meken tirkelgen. Onyń 48-inde qaýip barynsha azaıtylǵan.
— Bıyl sý tasqyny kezeńi aýa temperatýrasynyń joǵarylaýyna jáne jaýyn-shashynǵa baılanysty ádettegiden erte bastaldy. Qardyń qarqyndy erýi 4 aqpannan bastalyp, belsendi kezeńi 11–20 aqpan aralyǵyna sáıkes keldi. Jaǵdaı kún saıyn baqylaýda boldy, táýlik boıy kezekshilik uıymdastyryldy, — dedi Rınat Tazabekov.
Málimetinshe, oblystaǵy 48 sý burý kanalynyń 31-i arqyly tasqyn sýlary tranzıttik rejımde qaýipsiz ótti. Degenmen jergilikti sıpattaǵy sý basý derekteri Aqsý aýdany Altynaryq aýylynda, Taldyqorǵan qalasyndaǵy «Qyzyl tas» saıajaı qoǵamynda, sondaı-aq Qaratal aýdany aýmaǵyndaǵy oblystyq mańyzy bar avtojoldardyń eki ýchaskesinde tirkeldi.
— Turǵyn úıler men ınfraqurylym nysandary zardap shekken joq. Jol qozǵalysyna shekteý engizilgen joq, — dep atap ótti Rınat Tazabekov.
Qazirgi ýaqytta jazyq aýmaqtarda qar jamylǵysy 51% deńgeıinde saqtalsa, taýly óńirlerde qar qalyńdyǵy 146 santımetrge deıin jetedi. Qazgıdromet boljamyna sáıkes, naýryz aıynda jaýyn-shashyn mólsheri klımattyq normadan joǵary bolady dep kútiledi.
Ózenderdegi sý tasqyny jaǵdaıyn baqylaý úshin 60 gıdrobeket jumys isteıdi. Sý deńgeıi kópjyldyq kórsetkishterge sáıkes jáne ózen arnalarynda seń keptelisi baıqalmaıdy. Óńirdegi 8 sý qoımasynyń 5 sý jınaktaý rejıminde jumys istep tur. Ortasha tolymdylyǵy — 51%. Barlyq 114 gıdrotehnıkalyq nysan kúsheıtilgen baqylaýǵa alynǵan.
Jalpy oblys aýmaǵynda sý tasqynyna daıyndyq jumystary aldyn ala júrgizildi. Ótken jyly bastalǵan 26 ınjenerlik is-sharanyń 24-i tolyq aıaqtaldy. 3 shaqyrym qorǵanys dambasy salyndy, 14,8 shaqyrym aryq júıesi ornatyldy, 24 shaqyrym ózen arnalary tazartylyp, tereńdetildi. Taldyqorǵan qalasyndaǵy Qaratal ózenin bekitý jumystary 65% oryndaldy, Qaratal aýdanyndaǵy topyraq dambasyn jóndeý 10% deńgeıinde.
Qazsýshar RMK Jetisý oblysy fılıaly dırektorynyń orynbasary Baqyt Ábishevtiń aıtýynsha, sý sharýashylyǵy nysandarynda táýlik boıy kezekshilik uıymdastyrylǵan.
— Fılıal gıdrotehnıkalyq qurylystardyń jaı-kúıi men sý deńgeıin turaqty baqylaýda ustap otyr. Eskeldi aýdanynda jáne Qyzylaǵash sý qoımasynda zamanaýı akýstıkalyq habarlaý júıeleri ornatylǵan. Sý qoımalary shtattyq rejımde jumys istep tur, tasqyn sýlaryn qabyldaýǵa qajetti rezervter qamtamasyz etilgen, — dedi ol.
Óńirde yqtımal tótenshe jaǵdaılarǵa den qoıý úshin 130 myń qap, 5,5 myń tonna ınertti materıal jáne 82 tonna janar-jaǵarmaı daıyndalǵan. 235 evakýatsııalyq pýnkt ázirlenip, rezervte 2,6 mlrd teńge qarastyrylǵan.
Qutqarý jumystaryna 2965 adam, 534 tehnıka, 193 motopompa jáne 27 júzý quraly daıyn tur.
Tótenshe jaǵdaılarǵa daıyndyq maqsatynda oblysta 130 myń qap, 5,5 myń tonna ınertti materıal, 82 tonna janar-jaǵarmaı jáne 235 evakýatsııalyq pýnkt ázirlendi. Tótenshe jaǵdaılar rezervinde 2,6 mlrd teńge qarastyrylǵan. Qutqarý jumystaryna 2965 adam, 534 tehnıka, 193 motopompa men 27 júzý quraly saqadaı saı tur.
Aıta keteıik, aqpan aıynda Astanada sý tasqynyna qarsy aýqymdy sharalar bastaldy.