Jetisýda sý únemdeý tehnologııalarymen qamtylǵan alqap kólemi 4,6 ese ulǵaıdy
ASTANA. KAZINFORM — Qazaqstanda aýyl sharýashylyǵynda sý únemdeý tehnologııalaryn qoldaný aýqymy jyl saıyn keńeıip keledi, dep habarlaıdy QR AShM baspasóz qyzmeti.
Sý resýrstaryn utymdy paıdalaný jáne sýarmaly eginshiliktiń tıimdiligin arttyrýǵa baǵyttalǵan memlekettik saıasat aıasynda óńirlerde tamshylatyp jáne jańbyrlatyp sýarý tehnologııalarymen qamtylǵan alqap kólemi artyp, zamanaýı ári qoljetimdi sýarý júıeleri engizilip jatyr.
Máselen, Jetisý oblysynda sońǵy tórt jylda zamanaýı sýarý tehnologııalarymen qamtylǵan jer kólemi 4,6 esege, ıaǵnı 34 myń gektarǵa ulǵaıdy. Qazirgi tańda atalǵan tehnologııalar 43,1 myń gektar alqapta qoldanylyp otyr. Bul óńirdegi sýarmaly jerlerdiń 20,5 paıyzyn quraıdy.
Bıyl 33 aýyl sharýashylyǵy taýaryn óndirýshi 9,4 myń gektar alqapqa zamanaýı sýarý júıelerin engizdi. Jalpy 43,1 myń gektardyń 16,9 myń gektary tamshylatyp sýarýǵa, al 26,2 myń gektary jańbyrlatyp sýarýǵa tıesili.
«Agroholdıng Jetisý» JShS 1375 gektar alqapqa jańbyrlatyp sýarý tehnologııasyn engizdi. Sharýashylyqta 26 uńǵymadan sý alatyn 26 zamanaýı jańbyrlatqysh qondyrǵy jumys isteıdi. Qajetti ınfraqurylymdy qamtamasyz etý maqsatynda jalpy syıymdylyǵy 180 myń tekshe metrden asatyn alty sý jınaqtaýshy rezervýar salyndy. Sonymen qatar 40 shaqyrymnan astam elektr jelisi tartylyp, transformatorlar men elektr berý jelileriniń tirekteri ornatyldy.
— Bizdiń óńirde iri ózender joq. Sondyqtan sýmen qamtamasyz etýdiń negizgi kózi — jerasty sýlary. Avtomattandyrylǵan basqarý júıesi sýarý ýaqytyn jáne onyń qarqyndylyǵyn retteýge, sol arqyly resýrstardy tıimdi paıdalanýǵa múmkindik beredi. Dástúrli sýarý ádisimen salystyrǵanda sý shyǵyny 20–30 esege deıin azaıady, — deıdi sharýashylyq basshysy Ermek Tolybaev.
Memlekettik qoldaý salany tehnologııalyq jańǵyrtýdy keńeıtýdiń negizgi faktorlarynyń biri bolyp qala beredi. Osy baǵyttaǵy qosymsha quraldardyń biri — «QazAgroQarjy» AQ-nyń jeńildetilgen sharttarmen sý únemdeý tehnologııalaryna arnalǵan jabdyqtardy satyp alýǵa múmkindik beretin lızıngtik baǵdarlamasy.
Tamshylatyp jáne jańbyrlatyp sýarýmen qatar, oblysta polıetılen qubyrlaryn paıdalaný arqyly dıskretti sýarý tehnologııasy da damyp keledi. Búginde bul tehnologııa 35 sharýa qojalyǵynda 3,7 myń gektar alqapta qoldanylýda.
Máselen, «Jetisu agro complex» JShS 1150 gektar alqaptyń barlyǵyna dıskretti sýarý tehnologııasyn engizdi. Sharýashylyq basshylyǵynyń aıtýynsha, bul tehnologııa sýarý sýyn 30–40 paıyzǵa deıin únemdeýge múmkindik beredi. Sonymen qatar eńbek shyǵyndary da azaıady.
Kásiporyn jańbyrlatyp sýarý tehnologııasyn qoldaný aýqymyn da ulǵaıtyp keledi. Kelesi jyly 12 jańbyrlatqysh qondyrǵynyń kómegimen 500 gektar alqapty qamtý josparlanyp otyr.
Salany odan ári damytý aıasynda zamanaýı sýarý tehnologııalarymen qamtylǵan jer kólemin edáýir ulǵaıtý mindeti qoıyldy.
2030 jylǵa qaraı Jetisý oblysynda bul kórsetkishti 175,2 myń gektarǵa jetkizý josparlanyp otyr. Al bıyl zamanaýı sýarý tehnologııalarymen qamtylǵan alqap kólemi 79,2 myń gektarǵa deıin ulǵaıtylýy tıis. Onyń ishinde 43 myń gektar tamshylatyp sýarý, 36,2 myń gektar jańbyrlatyp sýarý tehnologııalarynyń esebinen qamtylady.
Sý únemdeý tehnologııalaryn qoldaný aýqymyn keńeıtý sýarmaly jerlerdiń tıimdiligin arttyrýǵa, sýdyń ysyrap bolýyn azaıtýǵa jáne óńirdiń aýyl sharýashylyǵyn turaqty damytýǵa qolaıly jaǵdaı jasaýǵa múmkindik beredi.
Buǵan deıin elimizde sý únemdeý tehnologııasyn engizýdi qoldaıtyn keshendi baǵdarlama ázirlenetinin jazǵanbyz.
