Jetisýda sot sportzalda qaıtys bolǵan jas jigittiń isin qarap jatyr

TALDYQORǴAN. KAZINFORM — Bıyl 3 qańtar kúni Kerbulaq aýdany Taldybulaq aýylynyń turǵyny Dıdar Eshmuhamet aýyr dene jaraqatynan keıin kóz jumdy.  

Anasy Sulýshash Sembaevanyń aıtýynsha, uly sol kúni keshke voleıbol oıynyn tamashalaýǵa ketken. Alaıda birneshe saǵattan keıin onyń otbasy jas jigittiń qaıtys bolǵany týraly habar alady.

Oıyn kezinde aıyptalýshy Dıdardy sportzaldyń kıim aýystyratyn bólmesine shaqyrǵan. Bólme qarańǵy, ári tar. Anasynyń paıymdaýynsha,shabýyl dál sol jerde bolǵan.

— Pyshaq 15 santımetrge enip ketken. Jaraqatty qasaqana salǵan. Barlyq ómirlik aǵzalary, sonyń ishinde júregi de zaqymdalǵan. Bul jaraqattan keıin tiri qalý múmkin emes, — deıdi ol.

Jábirlenýshiniń týystarynyń aıtýynsha, qaıǵyly oqıǵadan birneshe kún buryn jas jigitter arasynda janjal týyndaǵan. Olar 2025 jyly 30 jeltoqsanynda tóbelesken.

Sottalýshynyń aıtýynsha, oqıǵa bolǵan kúni olar qaıtadan tóbelesip, ol Dıdardy ólimshi etip urǵan. Alaıda jábirlenýshiniń otbasy bul túsinikpen kelispeıdi.

— Vıdeoda olardyń kıim aýystyratyn bólmege birge kirgeni, al biraz ýaqyttan keıin ol jalǵyz shyqqany kórinedi. Bul ádeıi boldy. Meniń ulym pyshaq ustaǵanyn bilmedi. Áıtpese, ózin qorǵaýǵa bolatyn edi, — deıdi Sulýshash Sembaeva.

Jábirlenýshi tarap sol kúni aıyptalýshyny mas kúıinde kórgenin aıtady. 

Marqumnyń ápkesi Aqbota bul oqıǵany kisi óltirý dep eseptep, is 99-bap («Adam óltirý») emes, Qazaqstan Respýblıkasy Qylmystyq kodeksiniń 106-baby («Adam ólimine ákep soqtyrǵan densaýlyqqa aýyr zııan keltirý») boıynsha qaralyp jatqanymen kelispeıdi.

— Biz bulistiń zań sheńberinde qatań qaralýyn suraımyz. Sot otyrysy Saryózekte ótip jatyr, biraq ol aýystyryldy — olar kýágerlerdiń barlyǵy kelmeı jatqanyn alǵa tartty, — deıdi ol.

Jetisý oblystyq polıtsııa departamenti sotqa deıingi tergeý amaldary aıaqtalǵanyn habarlady. Vedomstvonyń málimetinshe, qajetti tergeý áreketteriniń tolyq kesheni aıaqtalyp, odan keıin qylmystyq is pen aıyptaý aktisi aýdandyq sotqa joldandy.

— Aıyptalýshy qamaýda, al tergeý departament basshylyǵynyń erekshe baqylaýynda boldy, — delingen habarlamada.

Qazir sot otyrysy jalǵasyp jatyr. Marqumnyń týystary sot istiń barlyq mán-jaıyn jan-jaqty baǵalap, ádil sheshim shyǵarady dep úmittenedi.

Buǵan deıin Talǵarda er adam azamattyq nekedegi jubaıyn pyshaqtap óltirgeni týraly jazdyq.