Jetisýda shomylý maýsymy qaýipsiz ótip jatyr: qaıǵyly oqıǵalar sany azaıdy
TALDYQORǴAN.KAZINFORM – Oblysta shomylý maýsymynyń bastalýyna oraı sý aıdyndarynda azamattardyń qaýipsizdigin qamtamasyz etý maqsatynda profılaktıkalyq sharalar kúsheıtildi. Bul týraly óńirdiń TJD baspasóz qyzmeti habarlady.
Atalǵan baǵyttaǵy jumystardy oblystyq Tótenshe jaǵdaılar departamentiniń qyzmetkerleri jergilikti atqarýshy organdarmen, polıtsııamen jáne eriktilermen birlesip júrgizip jatyr.
Vedomtstvo málimetinshe, 2025 jyldyń basynan beri oblys aýmaǵyndaǵy sý aıdyndarynda bir adamnyń sýǵa batý deregi tirkelgen, bul jaǵdaı shomylý maýsymymen baılanysty emes. Al 2024 jyldyń dál osy kezeńinde 6 adam qaza taýyp, olardyń 5-eýi jaz mezgilinde sýǵa ketken bolatyn.
Sonymen qatar 2024 jylǵy shomylý maýsymynda 5 adam, onyń ishinde 3 bala kóz jumǵan. Bul kórsetkish aldyn alý sharalarynyń jáne ata-analar tarapynan baqylaýdyń qajettiligin kórsetedi.
– Jyl basynan beri Jetisý oblysynyń qutqarýshylary 27 adamdy ajaldan arashalap qaldy. 2024 jyly bul kórsetkish 36 adamdy qurasa, onyń 8-i balalar bolǵan. Al bıylǵy jyly qutqarylǵandar arasynda balalardyń bolmaýy – ata-analar men turǵyndardyń qaýipsizdik talaptaryn saqtaý deńgeıiniń artqanyn ańǵartady, – delingen habarlamada.
Ákimshilik quqyq buzýshylyqtar boıynsha da oń dınamıka baıqalady.
– 2025 jyly sý aıdyndarynda qaýipsizdik erejelerin buzǵany úshin QR ÁQBtK-niń 412-babyna sáıkes 2 adam jaýapqa tartylyp, jalpy somasy 13 762 teńge kóleminde aıyppul salynǵan. Al 2024 jyly osy kezeńde 42 jeke tulǵa 542 724 teńge aıyppul tóledi, onyń basym bóligi – shomylý maýsymynda tirkelgen, – dep habarlady departament.
Oblystyq Tótenshe jaǵdaılar departamenti azamattardy sýdaǵy qaýipsizdik erejelerin qatań saqtaýǵa shaqyrady. Atap aıtqanda, tyıym salynǵan jerlerde shomylmaý, qutqarý quraldaryn paıdalaný, balalardy qaraýsyz qaldyrmaý qajet. Tek ortaq saqtyq pen jaýapkershilik arqyly jazǵy demalysty qaýipsiz ótkizýge bolady.
Eske sala keteıik, Pavlodarda kanalǵa shomylýǵa barǵan jasóspirim sýǵa batyp ketkenin jazǵanbyz.