Jetisýda sheteldikter ıelik etken 2,3 myń gektar jer memleketke qaıtaryldy
ASTANA. KAZINFORM — Jetisý oblysynda sheteldik qatysýy bar kompanııanyń zańsyz ıeligindegi 2,3 myń gektardan astam aýyl sharýashylyǵy jeri memleketke qaıtaryldy. Jer ýchaskeleriniń jalpy quny shamamen 50 mln teńge bolǵan.
Jer zańnamasynyń saqtalýyna júrgizilgen taldaý barysynda bul jerlerge ıelik etken kompanııanyń quryltaıshylary Irannyń úsh azamaty ekeni anyqtalǵan. Jer ýchaskeleri Eskeldi aýdanynda ornalasqan jáne Qazaqstan Respýblıkasynyń Jer kodeksi talaptaryn buza otyryp berilgen.
Memleket múddesin qorǵaý maqsatynda Eskeldi aýdanynyń prokýratýrasy jer ýchaskelerin memleket menshigine qaıtarý týraly sotqa talap aryz bergen.
Sot prokýratýranyń talabyn qanaǵattandyryp, 2,3 myń gektardan astam aýyl sharýashylyǵy jerin memleketke qaıtarý týraly sheshim shyǵardy.
Alaıda sot sheshimi ázirshe zańdy kúshine engen joq.
Prokýrorlyq den qoıý sharalarynyń nátıjesinde Jetisý oblysynda jalpy quny 1,7 mlrd teńgeden asatyn 41,1 myń gektardan astam jer memleketke qaıtarylǵan.
Eske salaıyq, buǵan deıin Aqmola oblysynda 121 myń gektar jer memleket menshigine qaıtarylǵanyn jazǵan edik.
