Jetisýda sheneýnik múgedektik qujatyn bergeni úshin 450 myń teńgeden para alyp otyrǵan

TALDYQORǴAN. KAZINFORM — Taldyqorǵan qalalyq sotynda para alǵan men bergenderdiń isi qaraldy. 

Bir sottalýshyǵa para alǵany úshin (QK 366-babynyń 3-bóliginiń 4-tarmaǵy), úsheýine para alý boıynsha deldal bolǵany (QK 368-babynyń 2-bóligi, 1-bóligi), beseýine para bergeni (QK 367-babynyń 1-bóligi) úshin aıyp taǵyldy.

Jergilikti eńbek departamenti medıtsınalyq-áleýmettik saraptama bóliminiń basshysy deldaldar — Panfılov aýdandyq aýrýhanasynyń travmatology, Sarqan aýdandyq aýrýhanasynyń psıhıatry jáne Aqsý aýdandyq aýrýhanasynyń ÝZI dárigeri arqyly birneshe ret 450 myń teńgeden para alǵan. 

Bes adam para berip, múgedektik alyp, uzartqan.   

Sot úkimimen bólimniń burynǵy basshysy 8,7 mln ​​teńge (paranyń 60 eselengen mólsheri) aıyppul tóleıtin boldy. 

Travmatologqa 9 mıllıon teńge aıyppul salyndy (paranyń 20 eselengen mólsheri);

Psıhıatr men ÝZI dárigeri sáıkesinshe 300 myń teńge jáne 700 myń teńge (paranyń 10 eselengen somasy) aıyppul tóleıdi. 

Bes para berýshige Qylmystyq kodekstiń 367-babynyń 1-bóligi boıynsha 450 myńnan 1,5 mıllıon teńgege deıin aıyppul salyndy.

Aıyppuldy tóleýden jaltarǵan jaǵdaıda tólenbegen bóligi bas bostandyǵynan aıyrý jazasyna aýystyrylady.

Úkim zańdy kúshine engen joq.