Jetisýda Sarqan aýdany bilim bóliminiń bas býhgalteri qamaýǵa alyndy
ASTANA. KAZINFORM – Jetisý oblysy Sarqan aýdany bilim bólimi bas býhgalteri iri kólemde aqsha jymqyrdy degen kúdikpen tergelip jatyr. Bul týraly Sybaılas jemqorlyqqa qarsy is-qımyl agenttigi tóraǵasynyń kómekshisi, resmı ókil Danııar Bıgaıdarov málim etti.
«Agenttik bilim berý salasynda 206 qylmystyq isti tirkedi. Olar boıynsha zalal 14 mlrd teńgeden asty. Jalpy, jymqyrýdyń eń úlken somasy Túrkistan, Jetisý, Qyzylorda, Almaty, Aqtóbe oblystarynda jáne Almaty qalasynda anyqtaldy. Jymqyrý faktileri anyqtalýda. Jaqynda Jetisý oblysy boıynsha Sybaılas jemqorlyqqa qarsy qyzmet oblys prokýratýrasynyń qatysýymen Sarqan aýdany bilim bólimi bas býhgalteriniń zańsyz qyzmetiniń jolyn kesti», - dedi Danııar Bıgaıdarov agenttikte ótken baspasóz máslıhatynda.
Onyń aıtýynsha, qazir tergeý amaldary júrip jatyr.
«Ol Bilim bólimi býhgalterleriniń shotyna artyq belgilengen jalaqyny zańsyz aýdarý jolymen asa iri mólsherde 1 mlrd teńgeden astam somada bıýdjet qarajatyn jymqyrdy dep kúdikke ilindi. Tergeý áreketteri barysynda 156 mln teńge somasynda aqshalaı qarajat tabylyp, tárkilendi. Sottyń sanktsııasymen kúdikti qamaýǵa alyndy», - deıdi ol.
