Jetisýda saq dáýiriniń qorǵandary zańsyz qazylyp, búlingen
TALDYQORǴAN. KAZINFORM — Jetisý oblysynyń Panfılov aýdanynda kóne saq dáýirine tıesili qorǵandar tonaldy. Bul týraly Jetisý oblysynyń tarıhı-mádenı murany qorǵaý ortalyǵy málimdedi.
Belgili bolǵandaı, Jarkent qalasynan shamamen 100 shaqyrym qashyqtyqta ornalasqan qorǵandardy belgisiz bireýler aýyr tehnıka kómegimen qazyp, tarıhı-mádenı murany búldirgen.
Alǵashqy bolyp bul jaǵdaıdy jergilikti turǵyn Oleg Tıhomırov baıqap, tıisti organdarǵa habarlaǵan. Onyń aıtýynsha, qorǵandar shamamen bir aı buryn zaqymdalǵan.
Ortalyq mamandarynyń pikirinshe, bul qorǵandarda skıf dáýiriniń kósemderi jerlenip, sol kezeńge tán qundy buıymdar, sonyń ishinde altyn artefaktiler bolýy múmkin.
— Zańsyz arheologııalyq jumystarmen aınalysatyn adamdar el tarıhyna orny tolmas zııan keltirdi. Biz bul fakt boıynsha quqyq qorǵaý organdaryna resmı júgindik, — dedi Eskertkishterdi qorǵaý ortalyǵynyń dırektory Ǵalymjan Ospanov.
Sonymen qatar qorǵandar memleket qorǵaýynda bolǵanyna qaramastan, qylmyskerler zańdy aınalyp ótip, bul áreketti júzege asyrǵan.
Qazirgi ýaqytta jergilikti atqarýshy organdar arheologııalyq eskertkishterdi qorǵaý sharalaryn kúsheıtý máselesin qarastyryp jatyr.
Sondaı-aq atalǵan oqıǵa boıynsha polıtsııa tarapynan vandalızm baby boıynsha qylmystyq is qozǵaldy.
— Qazirgi kezde tergeý is-sharalary júrgizilip jatyr. Qalǵan aqparat Qylmystyq-protsestik kodekstiń 201-babyna sáıkes jarııalanbaıdy, — dedi Jetisý oblysy polıtsııa departamentiniń baspasóz qyzmeti.
Aıta keteıik, buǵan deıin Almatyda memleket qorǵaýyna alynǵan qansha eskertkish bar ekenin jazǵanbyz.