Jetisýda polıtseılerdiń jalaqysyna qansha qarjy bólindi
TALDYQORǴAN. KAZINFORM — 2025 jyly Jetisý oblystyq polıtsııa departamenti qyzmetkerleriniń eńbekaqysy ulǵaıady, dep habarlaıdy vedomstvonyń qarjymen qamtamasyz etý basqarmasy.
Oblystyq polıtsııa departamentiniń bıýdjet jaıly qujatyna sáıkes, 2025 jyly vedomstvonyń qyzmetin qarjylandyrý kólemi respýblıkalyq jáne jergilikti bıýdjet esebinen ulǵaıyp otyr.
— 2025-2027 jyldarǵa arnalǵan respýblıkalyq bıýdjet týraly zańǵa sáıkes, kelesi jylǵa respýblıkalyq bıýdjetten 3 mlrd 969 mln teńgeden astam qarajat bólindi. Onyń 3 mlrd 194 mln teńgesi tikeleı eńbekaqy tóleý qoryna baǵyttalady. Bul 2024 jylǵy kórsetkishpen salystyrǵanda shamamen 300 mln teńgege kóp. Sonymen qatar, jergilikti bıýdjetten bólingen 13 mlrd 542 mln teńgeniń 6 mlrd 571 mln 384 myń teńgesi jalaqy tóleýge baǵyttalǵan. Bul ótken jylǵy 5 mlrd 297 mln teńgemen salystyrǵanda joǵary, — delingen habarlamada.
Bul ózgeris tártip saqshylarynyń qyzmetine degen talap pen jaýapkershiliktiń ósýimen qatar júrýi tıis. Sonymen qatar polıtsııa qyzmetkerlerin qoldaý — óńirdegi qoǵamdyq qaýipsizdikti qamtamasyz etýdiń mańyzdy tetigi.
Aıta keteıik, ótken jyly polıtsııaǵa bólingen qarjy tolyǵymen ıgerilgen. Jergilikti bıýdjetten 12,9 mlrd teńge bólinip, ıgerý deńgeıi 99,3 paıyz boldy.
Al respýblıkalyq bıýdjetten 3,8 mlrd teńge qarastyrylyp, túgeldeı maqsatty túrde jumsaldy.
Eske sala keteıik, buǵan deıin Jetisý oblysynda polıtseıdiń tútinge tunshyqqan úıden úsh balany aman alyp shyqqanyn habarlaǵan bolatynbyz.