Jetisýda muǵalimniń úndeýinen keıin dırektordyń orynbasary qyzmetinen bosatylyp, birqatar qyzmetkerge sógis jarııalandy
TALDYQORǴAN. KAZINFORM — Jetisý oblysy Alakól aýdanyndaǵy mektepterdiń biriniń muǵalimi beıneúndeý jasap, onda oqý orny ákimshiligi tarapynan qysym kórsetilip, óziniń quqyqtary buzylǵanyn málimdegen. Bul týraly Kazinform agenttiginiń tilshisi jazdy.
Pedagogtyń aıtýynsha, mektep basshylyǵy onyń kásibı qyzmetine kedergi keltirip, jumys isteýine qolaısyz jaǵdaı jasaǵan.
— Zańnamaǵa sáıkes, meniń quqyqtarym buzyldy. Mende mekteptegi zańbuzýshylyqtardy dáleldeıtin barlyq aıǵaqtar men jazbalar bar, — dedi ol.
Úndeýde sondaı-aq muǵalimniń aýyr emotsıonaldyq jaǵdaıda ekeni aıtylǵan. Ol sýıtsıdke áreket jasaǵanyn habarlap, quzyrly organdardan eń qatań sharalar qabyldaýdy suraǵan.
Úndeý jarııalanǵannan keıin birden tekseris júrgizildi.
Jetisý oblystyq bilim basqarmasynyń málimetinshe, atalǵan fakti boıynsha ýákiletti organdardyń qatysýymen tıisti sharalar uıymdastyrylǵan.
— Geografııa páni muǵaliminiń quqyqtaryn qorǵaý maqsatynda tekseris júrgizildi. Nátıjesinde osy mekteptiń dırektoryna, pedagog-psıhologqa, áleýmettik pedagogqa jáne synyp jetekshisine qatań sógis jarııalandy. Sonymen qatar, tárbıe isi jónindegi dırektordyń orynbasary atqaryp otyrǵan qyzmetinen bosatyldy, — dedi bilim basqarmasy basshysynyń orynbasary Qaırat Qasymov.
Sonymen qatar, quzyrly organdardyń málimetinshe, tergeý áreketteri júrgizilgen.
— Polıtsııa tıisti tekserýler júrgizdi. Saraptama qorytyndylary boıynsha sýıtsıd áreketi rastalmady, — dep habarlady vedomstvo.
Bilim basqarmasynda bul baǵyttaǵy jumys jalǵasyp jatqanyn atap ótti.
— Mekteptegi bilim sapasyn arttyrý úshin arnaıy komıssııa quryldy. Qazirgi ýaqytta qosymsha tekserý sharalary júrgizilýde, onyń qorytyndysy boıynsha tıisti sheshimder qabyldanady, — dep tolyqtyrdy vedomstvo.
Buǵan deıin Taldyqorǵanda 11-synyp túlekteriniń bitirý keshine qatysty múmkin bolatyn aqsha jınaý máselesi kóterilgeni habarlanǵan edi — ata-analar bir otbasydan 250 myń teńgege deıin suralǵanyn aıtqan.
Buǵan deıin pedagogter balalardyń ómiri men densaýlyǵy úshin tek oqý-tárbıe protsesi kezinde jaýapty bolatynyn jazdyq.
