Jetisýda mektep ashanasyndaǵy samsadan aq qurttar shyqty
ASTANA. KAZINFORM — Jetisý oblysy Kóksý aýdanyndaǵy mektepte jaısyz jaıt oryn aldy. Áleýmettik jelide Medeýbaı Qurmanov atyndaǵy № 2 mekteptiń oqýshysy satyp alǵan samsadan aq qurttar shyqqan, dep habarlaıdy Kazinform tilshisi.
Oqýshy jybyrlaǵan dernásilderdi vıdeoǵa túsirgen. Áleýmettik jelide keń tarap ketken beıne jazba oblys turǵyndarynyń ashý-yzasyn týdyrdy. Kadrlarda mektep nan ónimderiniń ishinde bir nárseniń qozǵalyp jatqany anyq kórinedi. Instagram jelisindegi vıdeoǵa ashýlanǵan halyq tez arada tergeý júrgizý qajet dedi.
Mektep oqýshylarynyń ata-analary jergilikti bılikke habarlasyp, túsinikteme berýdi talap etti.
Kóksý aýdandyq bilim bóliminiń basshysy Qýat Kúzbaev jaǵdaıǵa qatysty pikir bildirdi.
— Jarııalanǵan beınejazbadan habardarmyz. Mekteptiń ata-analar komıtetimen birlesip tekserý júrgizilip jatyr. Aýdandyq sanıtarlyq-epıdemıologııalyq baqylaý bólimine resmı saýal joldandy. Sanıtarlyq tekseris qorytyndysy boıynsha mektep ashanasyn jalǵa alýshyǵa QR zańnamasyna sáıkes shara qoldanylady, — dedi bólim basshysy.
Tekserý nátıjesi áli jarııalanbady. Aýdan turǵyndarynyń alańdaýshylyǵy artyp keledi. Eger mektep ashanasy shynymen de sanıtarlyq talaptardy óreskel buzsa, bul bilim berý uıymdaryndaǵy tamaqtandyrý júıesi úshin dabyl bolmaq.
Buǵan deıin Almatydaǵy mektep ashanasynda sanıtarlyq normalar saqtalmaǵany úshin dırektor jazalandy.