Jetisýda medıtsınalyq qaldyqtardy zańsyz joıǵandarǵa 2 mln teńge aıyppul salyndy

ASTANA. KAZINFORM — Jetisý oblysynda medıtsınalyq qaldyqtardy kádege jaratý kezinde zań buzýshylyqtar anyqtaldy, dep habarlaıdy oblystyq prokýratýranyń baspasóz qyzmeti.

Jetisý oblysynda qaýipti medıtsınalyq qaldyqtardy arnaıy ruqsatsyz (lıtsenzııasyz) óńdep, joıǵan merdiger uıymdar áshkerelendi.

Zań boıynsha (Densaýlyq týraly kodekstiń 100-baby), G klasyna jatatyn medıtsınalyq qaldyqtar — adam densaýlyǵy men qorshaǵan ortaǵa óte qaýipti. Olar óndiristik qaldyqtarmen birdeı deńgeıde qarastyrylady. Mundaı qaldyqtardy joıý úshin arnaıy lıtsenzııa qajet (Ekologııalyq kodekstiń 336-baby).

— Alaıda tekseris barysynda lıtsenzııasy joq 8 merdigermen kelisimshart jasalyp, olar qaýipti qaldyqtardy óńdep, joıǵany anyqtaldy. Osy zańbuzýshylyqtar úshin tabıǵat qorǵaý prokýratýrasy shara qoldanyp, tártip buzǵan merdigerlerge 2 mıllıon teńgeden astam aıyppul salyndy, — delingen vedomstvo habarlamasynda.

Sonymen qatar, osy kelisimsharttarǵa jaýapty bolǵan 8 laýazymdy tulǵa tártiptik jazaǵa tartyldy.

Budan buryn Jetisý oblysynda memlekettik jer qoryn óz betinshe paıdalanýǵa jol berilmegenin jazǵan edik.