Jetisýda mal urlaǵandar kóliginen aıyrylyp jatyr

ASTANA. KAZINFORM — Jetisý oblysynda barymtashylardyń múlki memleket kirisine tárkilendi, dep habarlaıdy vedomstvonyń baspasóz qyzmeti.

Jetisý oblysynyń prokýratýrasy mal urlyǵyna qatysty ister boıynsha memlekettik aıyptaýdy qoldaý kezinde qylmys quraldaryn tárkileý máselesine erekshe nazar aýdarady.

Sot praktıkasy kórsetkendeı, urlanǵan maldy tasymaldaý úshin paıdalanylǵan avtokólikti alyp qoıý túrindegi quqyqtyq saldar qylmystyq jolmen tabylǵan tabys kóleminen birneshe ese asyp túsedi. Máselen, Qaratal aýdandyq sotynyń úkimimen úsh adam eki bas usaq maldy urlaǵany úshin kináli dep tanyldy. Shyǵyn somasy 140 myń teńgeni quraǵanyna qaramastan, sottalǵandar úshin materıaldyq shyǵyn aıtarlyqtaı joǵary boldy. Sot prokýrordyń ýájderine súıene otyryp, kinálilerge 5 jylǵa shartty túrde bas bostandyǵynan aıyrý jazasyn taǵaıyndady jáne qylmys quraly retinde avtokólikti memleket paıdasyna tárkiledi. Osylaısha, bir rettik zańsyz paıda tabý áreketi baǵaly múlikten aıyrylýǵa jáne sottylyqqa ákep soqty.

— Osyndaı sot praktıkasy Panfılov aýdanynda da qoldanyldy. Onda jergilikti turǵyn mal urlaǵany úshin 5 jylǵa shartty túrde sottalyp, onyń kóligi qaıtarymsyz negizde memleket menshigine alyndy, — delingen habarlamada.

Oblys prokýratýrasy mal urlyǵy úshin múlkin tárkileýmen birge 12 jylǵa deıin bas bostandyǵynan aıyrý túrindegi qylmystyq jaýaptylyq qarastyrylǵanyn eskertedi. 

Buǵan deıin Túrkistan oblysynda mal urlyǵymen aınalysqan toptyń áreketine tosqaýyl qoıylǵanyn jazǵanbyz.