Jetisýda laı kóshkin «Saryózek – Kóktal» jolynyń ýchaskesin shaıyp ketti
ASTANA. KAZINFORM — 24–25 tamyzda Jetisý oblysynyń Panfılov aýdanynda mol jaýyn-shashyn tústi. Taýly jer bederiniń ereksheligine baılanysty betkeılerden aqqan sý kúsheıip, respýblıkalyq mańyzy bar KZ19-01 «Saryózek — Kóktal» avtomobıl jolynyń jekelegen ýchaskelerin shaıyp ketti.
— Jaýyn-shashyn saldary joldyń birneshe ýchaskesinde tirkeldi. Laı kóshkin joldyń júrý bóligin kesip ótip, keı jerlerde jol jıegi men jer tósemin shaıyp ketip, sondaı-aq qorshaý elementteri zaqymdanǵan. Shaǵyn kópirler men sý ótkizý qurylystarynyń mańyna laı men tas jınalyp, keıbir sý burý aryqtary kelgen sý kólemin tolyq ótkize almady, — delingen QazAvtoJol taratqan habarlamada.
Qazirgi ýaqytta taý betkeılerinen sý aǵýy toqtady. Joldyń júrý bóliginde sý tasý derekteri joq, sý deńgeıi tómendep, jaǵdaı turaqtaldy.
— Jol qyzmetteri jaýyn-shashyn saldaryn joıý jumystaryna jedel kiristi. Qazirgi ýaqytta 11 jol mamany men 7 arnaıy tehnıka jumyldyrylǵan. JPB-90 jáne JPB-18 qyzmetkerleri joldyń júrý bóligin, jol jıekterin, sý burý aryqtaryn, shaǵyn kópirler men sý ótkizý qurylystaryn laı-tas shógindilerinen tazartyp jatyr.
Sonymen qatar shaıylǵan jer tósemi men jol jıekterin nyǵaıtý, sý burý júıesin qalpyna keltirý jáne zaqymdanǵan qorshaý elementterin jóndeý jumystary júrgizilip jatyr.
Mamandar joldy tekserýdi jalǵastyryp, zaqymdaný kólemin jáne jekelegen ýchaskelerdi tolyq qalpyna keltirýge qajetti materıaldardyń mólsherin naqtylap jatyr. Avtojoldyń jaǵdaıy jol qyzmetteriniń turaqty baqylaýynda.
Aıta ketelik Aqtóbede eki jyl burynǵy sý tasqyny kezinde jaramsyz bolyp qalǵan kópir jańǵyrtylǵan edi.
